Nutaarsiassat

10-05-2006

Nersornaat sølviusoq tunniunneqartoq

Namminersornerullutik Oqartussat nersornaasiuttagaata Nersornaat sølviusup niviarsiaq soraarnermut Ester Balle, Løgumkloster, sapaammi ulloq 7. maj 2006 tunniunneqarnerani Inatsisartut Siulittaasuata Jonathan Motzfeldtip oqalugiaataa.

Asasara Ester Balle, Estannguaq.

Nunatsinni peqqinnissaqarfimmi annertuumik suliaqarsimanerit pillugu Namminersornerullutik Oqartussat qutsvigiumallutit nalliuttorsiualaarnermut matumunnga illit qaaqqusatillu tikilluaqqusinnaagassi nuannaarutigeqaara.

Oqartariaqarpunga pissanganartumik iluaqutaalluartumillu inuuneqarsimasutit, napparsimasunik sullissinermi inuunerit tunniusimalluarsimallugu. Kalaallit Nunaanni inunngorputit meeraanerpillu ilaa taavaniillutit. Ataatarsi annaagassiuk ilaquttatit ilagalugit Danmarkimut nuuttariaqarsimavutit.

Sorsunnersuup kingulliup nalaani USA¿mi niviarsiamut ilinniarputit, ilaatigullu sorsunnermi tigusanut niviarsiatut sulisimallutit.

1940¿kut naalersut Danmarkimut uterputit tamatumalu kingorna 1950¿ikkunni Kalaallit Nunaaliaqqillutit, Namminersornerulernissarlu sioqqutitsiarlugu soraarninngornissavit tungaanut tassaniillutit. Tassunga ilanngullugu oqaatigisinnaavara ukiuni marlussunni Jerusalaamut nuukkallarsimagavit.

Ernisussiortut ilinniarfiat ukiorpassuarni pisortaaffigisimasat Aasianni aallarnisarpat. Isumaqartuarsimavutit niviarsiap suliassarpassuisa ilaat, suliassat taamaattut isumaginissaat siunertaralugu tunngaviusumik ilinniagaqarsimagaanni, nunatsinni najugaqavissunit, ilinniagaqarneq aqqutigalugu ajornanngitsumik suliarineqarsinnaasut. Tunngaviusumik eqqarsaat taanna nunatsinni peqqinnissaqarfimmut iluaqutaasimaqaaq, Namminersornerulernerullu eqqunneqarnerata kingunerujussua ilinniartitaaneq niviarsinut ilinniartitaanerup pilersinneqarnera tikillugu atuussimalluni. Eqqarsaatitit Kalaallit Nunaannut Ministereqarfiup isumaqatigisimanngilai, taamatulli isumaqarneq kingorna pakatsisinneqarpoq. Nunatsinni pissutsit immikkut ittut atorlugit peqqinnissakkut sullissinerup ineriartortinneqarnerani akuulluarlutit suliniarsimanerit iluaqutaasimaqisoq oqaatigisariaqarpoq.

Peqqissaartumik ilinniartinneqarnissaq pingaartitareqigakku ilinniartuutigisarpassuavit ilaat suliaqarfimminni maligassiuisunngorsimapput.

Nunaqarfimmissaaq napparsimasunik sullissineq misilikkumagakku Kalaallit Nunaanni sulinerit Kangaatsiami naggaserpat.

Qaammatialunnguit qaangiuppata inuunerpit ingerlarnganik atuakkiavit saqqummernissaa tamatta qilanaaraarput. Isigiarsukkaluarlutit tusillannikuugaluarlutillu Kalaallit Nunaanniissimanernit assilisat seqersittakkat atorlugit suli oqalugiartarputit. Aamma assiliillaqqissuuvutit, ukiorpassuarnilu nunatsinni najugaqarsimanngikkaluarlutit oqaatsivut ippinnaateqanngilluinnartumik atortuarpatit.

Taamaammat Inatsisartut Siulittaasoqarfiat sinnerlugu Nersornaat sølviusoq ilinnut tunniussinnaagakku nuannaarutigeqaara.

Uummammit pisumik pilluarit