2024 2023 2022 Flere år...
08-05-2006
Inatsisartut Siulittaasuata tulliata siulliup Agathe Fontainip tusagassiorfinnut nalunaaruta
Inatsisartut Siulittaasoqarfiannik ataqatigiissagaanngitsumik saassussinermini Demokraatit Siulittaasuat tunngavissaqanngilaq
Tamat oqartussaaqataanerannik paasinninnini tunngavigalugu Siulittaasoqarfiup ataqqinassusianik Demokraatit Siulittasuat saassusseqqippoq, siunnersuutini Inatsisartunit malinneqanngikkaangata Inatsisartunut ilaasortaq Per Berthelsen Siulittaasoqarfimmut nikassaasinnaasutut imminut piginnaatittarpoq.
Ingerlatsinermut inatsisitigut tunngavissatigut oqaatigineqarpoq naligiit naligiimmik pineqartariaqartut. Tunngavissaq taanna Inatsisartut Siulittaasoqarfiata atorpaa.
Amerlanerit paasisinnaasaattut tunngavissatut akuerisaasup taassuma kingunerisussaanngilaa naliginngisat allaanerusumik pineqassasut. Inatsisartut Siulittaasoqarfiannik tugassiuutit atorlugit tunngavissaqanngitsumik saassussiuarnermigut tunngavissatut aallaaviusoq taanna Inatsisartunut ilaasortap Per Berthelsenip ajoraluartumik atunngilaa.
Inatsisartut ulloq 5. maj 2006 ataatsimiinnerat nalunaaquttap akunnerinik marlunnik minutsinillu 45-nik sivisussusilimmik unitsinneqareersoq ullormut oqaluuserisassanut ilanngutat suliarisinnaajumallugit Inatsisartut ataatsimiinnertik nal. 20.15-imut sivitsorpaat. Ataatsimiinnerup nanginneqarnissaa 19-it isumaqataaffigisaannik arfinillillu akerliuffigisaannik inersuarmi taasisitsinikkut alajangerneqarpoq.
Immikkoortup 49-p aamma 96-p, naalakkersuinikkut suliaqarnermi aningaasatigut tapiissuteqartarnermut tunngasut, kiisalu immikkoortup 62-ip, qinikkatut atuuffinnik arlalinnik ingerlatsisarnermut tunngasup, kinguartinneqarnissaat pillugu Demokraatit partiitut allatseqarfiata nal. 16.51 Inatsisartut Siulittaasoqarfiannut qinnuteqaat nukingiussatut suliassaq inersuarmi taasinissaq sioqqullugu nassiuppaa. Saaffiginnissut malillugu ulloq taanna 5. maj ataatsimiinermit ingerlasumit ulloq 15. maj 2006-ip kingorna piffissamut kinguartitsinissamik kissaateqarnermut tunngaviutinneqarpoq siunnersuuteqartoq Per Berthelsen 2006-imi ulloq 6. majimit ulloq 14. majimut aallaqqasussaammat.
Immikkoortut 49 aamma 96 ataatsimoortillugit suliarineqartussaammata kiisalu immikkortoq 96 inatsisissatut siunnersuutitut Inatsisartunit pingasoriarlugu suliarineqartussaammat Siulittaasoqarfimmi amerlanerussutillit immikkoortut taaneqartut kinguartinneqartinneqarnissaat Inatsisartunut inassutigiumanngilaat. Tamanna pillugu nalunaarut Inatsisartunut ilaasortap Per Berthelsenip nal. 17.45 tiguaa, tassungalu ilanngullugu ilisimatitsissutigineqarluni kinguartitsinissamik kissaatigisaq Inatsisartunut soorunami isummerfigisassanngortinneqarsinnaasoq. Oqaatigineqareersutut Inatsisartut aalajangerneratigut kinguartitsinissamik apeqqut isummerfigineqarpoq, tassani ataatsimiinnerup nanginneqarnissaa ilaasortanit 19-init kissaatigineqarluni ullormullu oqaluuserisassani immikkoortut sinneruttut suliarineqarnissaasa kinguartinneqarnissaa ilaasortat arfinillit kissaatigalugu.
Siunnersuutit ullut ataatsimiiffissat ataasiakkaat imarisaat ulluni pineqartuni suliarineqarnissaannik kissaateqarneq ulloq 5. maj 2006 ataatsimiinnerup nanginneqarnissaanik Inatsisartut aalajangernerannut tunngaviusimassasoq ilimagineqarluarsinnaavoq. Taamaaliornikkut ataatsimiititaliat sulinerisa Inatsisartullu ataatsimiinnerisa pilersaarusiorneqarnissaannut periarfissanik atorluaasoqassaaq.
Demokraatit kinguartitsinissamik kissaatigisaat malinneqarsimagaluarpat immikkoortoq 96, naalakkersuinikkut sulinermut tapiissutit, sapaatip akunnerata ataatsip ingerlanerinnaani, tassalu 2006-imi ulloq 16. majip ullullu 23. majip akornani pingasoriarlugu suliarineqarsimassagaluarpoq. Taamatut suliarinninnikkut peqqissaartumik suliarinninnissamik kissaateqarneq eqquutsinneqanngilluinnarsimassagaluarpoq.
Ullormut oqaluuserisassat nalinginnaasumik tunngavissaatitat saneqqullugit ingerlatsisoqarsimaneralugu Inatsisartunut ilaasortaq Per Berthelsen tusagassiuutitigut oqarmat, tamanna eqqortuunngilaq.
Akissuteqaateqartoqarsimannginnera siunnersuutilluunniit tiguneqarsimannginnera kingusinaarneraluunniit pissutigalugit kinguartitsinissamik ataatsimiititaliap, partiip qinigaatitaasa Naalakkersuisulluunniit kissaateqarnerat Inatsisartunullu ilaasortap Per Berthelsenip piffissami tullermi najuutinngitsussaanini pissutigalugu ullormi ataatsimiinnerup nal. 18.00 qaangerlugu ingerlanneqannginnissaanik kissaateqarnera assigiinngilluinnartuusut ersarippoq.
Ataatsimiinneq nal. 18.00 qaangerlugu ingerlanneqarpat nalinginnaasumik tunngavissaatitat sanioqqunneqartut Inatsisartunut ilaasotaq Per Berthelsen isumaqarpat, tamana aamma kukkuneruvoq. Taamaalillunilu Inatsisartut ulloq 3. maj 2006 ataatsimiinnerat innersuussutigineqassaaq, tamatumani Demokraatit ilaasortaatitaata siunnersuutaanik suliarinninneq nal. 18.15 aallartinneqarpoq nal. 19.00-illu kingorna naammassineqarluni. Suliat annertussusiat aammalu nal. 18.00 qaangerlugu sulinissaq pisariaqartinneqarnersoq qissimigaarlugu Inatsisartut sulinermik ingerlanissaa nalinginnaasumik ingerlaavartumillu nalilersortarpaat. Ulluni 3. aamma 5. maj 2006 taamatut pisariaqartitsisoqarsimasoq isumaqartoqarpoq.