2024 2023 2022 Flere år...
28-04-2006
Inatsisartut Siulittaasoqarfiata nalunaarutaanut oqaaseqaat
Tusagassiuutitigut nalunaarummi Hr. Jonathan Motzfeldtip malugeqqusimassagaluarpaa Siulittaasoqarfimmi ilaasortat tamarmiunngitsut taanna nalunaarutigigaat. Imarisaanut Siulittaasoqarfiullu pingaartumik Inatsisartunut Siulittaasoqarfittut sassarsinnaanerminut nukilaannera pillugu ataani atsiortunga isumaqataanngilluinnarama.
Upernaanerani ataatsimiinnissamut oqaluuserisassat piareersarneranni Inatsisartut Naalakkersuisullu siunnersuutinik suliarinninnerminni assigeerluinnarnik atugassaqartinneqarsimapput. Taamaammat Inatsisartunut ilaasortat nutserisitsinerit assigisaallu eqqarsaatigalugit Naalakkersuisutulli asserluinnaanik atugassaqartitaallutik.
Demokraatit isumaqarput sapinngisat sipporlugit siunnersuutinik amerlanernik saqqummiussisoqartassanngitsoq. Uagut inatsisartuni gruppitsinni sukumiisumik oqallittarsimavugut, tamannalu tunngavigalugu siunnersuutissat ilaat Ukiaanerani ataatsimiinnissamut kinguartikkallarsimallutigik, taamaalilluta siunnersuutinik torersunik suliarilluakkanillu saqqummiussinissaq qulakkeerusukkatsigu, taaneqassaarlu taakku piumasaqaataasutut oqaatsit marluiit atorlugit piffissaq eqqorlugu tunniunneqarsimammata.
Malunnarpoq Naalakkersuisut ataatsimiinnermi matumani sapinngisatik sipporlugit siunnersuutinik amerlanerungaartunik saqqummiussisimasut. Tamanna Naalakkersuisut ajornartorsiutigaat, Demokraatillu isumaqarput Naalakkersuisut siunnersuutiminnik pingaarnersiuisinnaannginnerat Inatsisartut Siulitaasoqarfiata illersussallugu suliassarinngikkaa.
Demokraatinit erseqqissaatigissallugu pingaaruteqarpoq, Siulitaasoqarfik Naalakkersuisut soqutigisaat aallullugit iliuuseqartussangorlugu pilersitaanngimmat.
Tamatumunnga atatillugu malugeqqunarpoq, ukiut qulingajaat matuma siorna IA¿p suliniuteqarneratigut inatsisiliortut naalakkersuisullu immikkoortinneqarmata, taamaammallu Inatsisartut Allattoqarfiat naalakkersuisunut illuatungiliuttussatut pilersinneqarluni.
Ataani atsiortunga taama allagaqarlunga Inatsisartut Siulittaasoqarfiata tusagassiuutitigut nalunaarutaanut sakkortuumik isumaqataannginnera ersersippara, erseqqissaatigeqqissallugulu Siulittaasoqarfimmi ilaasortat tamarmiullutik nalunaarut isumaqataaffiginngilluinnarmassuk.
Inussiarnersumik inuulluaqqusillunga
Per Berthelsen
Demokraatit siulittaasuat Inatsisartullu Siulittaasoqarfianut ilaasortaasoq
Erseqqinnerusumik paasisaqarusukkaanni uunga attaveqarfigineqarsinnaavunga; telefon 55 33 61