Nutaarsiassat

23-03-2007

Aningaasaqarnermut ataatsimiititaliap tusagassiutitigut nalunaarutaa

Attartortumit Piginnittumut aaqqissuussineq malillugu inissianik tunisisarnerup innuttaasunit piffissami kingullermi oqallisigineqarnera tunngavigalugu ataatsimiititaliap suliami inissisimanerani pissutsit aalajangersimasut erseqqissaatiginissaat Aningaasaqarnermut Ataatsimiititaliap kissaatigaa.

Pisortat inissiaataannik attartortittakkanik tuniniaasarnermi periaatsimut kommuni Namminersornerullutilluunniit Oqartussat piginnittuunersut aammalu inissiaq qanoq aningaasalersorneqaqqaarsimanersoq apeqqutaasarpoq.

Taamaalillunilu inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutaanni nr. 3-mi, 21. maj 2002-meersumi aalajangersakkani allassimavoq kommunit inissiaataannik attartortittakkat sananeqarneranni Namminersornerullutik Oqartussanit tapiiffigineqarsimasut tunineqarnissaanni makku piumasaqaataasut; tunisineq Naalakkersuisunit akuerineqassasoq, inissiat tunineqannginnerini tunisinermi atugassarititaasut pillugit illullu tunineqarnerani tunisinermi iluanaarutip atorneqarnissaa pillugu Naalakkersuisut kommunillu akornanni isumaqatigiittoqaqqassasoq, isumaqatigiissut taanna Inatsisartut Aningaasaqarnermut Ataatsimiititaliaannit akuerineqassasoq. Aalajangersagaq taanna aallaavigalugu kommunit inissiaataannik attartortittakkanik, sananeqarneranni Namminersornerullutik Oqartussanit tapiiffigineqarsimasunik arlallinnik, nuna tamakkerlugu tunisinernik Aningaasaqarnermut Ataatsimiititaliaq ukiut arlallit ingerlanerini ingerlaavartumik akuerinnittarsimavoq.

Aallaavittulli isigalugu kommunit inissiaataannik attartortittakkanik, sananeqarneranni Namminersornerullutik Oqartussanit tapiiffigineqanngitsunik kiisalu Namminersornerullutik Oqartussat inissiaataannik attartortittakkanik tunisineq kommunit Naalakkersuisullu akuersiseqqaarlugit aatsaat pisarpoq.

Piffissami 2002-mit 1. marts 2007-imi inissiat ¿Attartortumit Piginnittumut¿ peqqussut[1] malillugu inissiat tunineqartut allattorsimaffiannik Naalakkersuisunit suliarineqarsimasumik Inatsisartunut ilaasortamit § 36 naapertorlugu ulloq 20. marts 2007-imi apeqquteqaammut  akissummut ilanngussatut Inatsisartunut ilaasortat tigusaqarput.

Inissiat taakku tunineqarnissaannik akuerineqarnissamut qinnuteqaatinik Ataatsimiititaliaq nassinneqarsimanngimmat Aningaasaqarnermut Ataatsimiititaliap oqaatigissallugu tunngavissaqarsoraa. Taamatut akuersissuteqarneq Naalakkersuisunit pivoq. Nuummi inissiat pilerinartut ulluni kingullerni oqaluuserineqartut Aningaasaqarnermut Ataatsimiititaliamit akuerineqartarsimanerat pillugu Naalakkersuisut siulittaasuata Hans Enoksenip Qanoruumi ulloq 20. marts 2007-imi paasissutissiinera taamaalilluni eqqunngilaq.

Attartortumit Piginnittumut aaqqissuussineq malillugu illuutinik pilerinartunik tunisisarneq taamani Aningaasaqarnermut Ataatsimiititaliaasup isornartoqartittarsimavaa. Illuutinik pisortanut inissiaritinneqartunik tunisineq pillugu taamani Ineqarnermut, Attaveqarnermut Avatangiisinullu Naalakkersuisumut taamani ataatsimiititaliaasoq 2004-imi arlalinnik apeqquteqarpoq. Apeqqutinut taakkununnga akissut ataatsimiititaliamit ulloq 17. maj 2004-mi tiguneqarpoq. Akissutit taamani ataatsimiititaliaasoq Naalakkersuisunut ulloq 21. maj 2004-mi allagaqarnissamut pissutissaqalersippaa, taakkunanilu ataatsimiititaliaq ima allappoq:

¿Afhændelse af ejendomme fra chefboligpuljen mv.

Ataatsimiititaliamit Pisortanut il.il. inissiatut illuutinit immikkut atugassaqartitsilluni tuniniaasoqarsimasoq paasineqarsimammat Aningaasaqarnermut Ataatsimiititaliaq ulloq 11. maj Naalakkersuisunut allakkatigut apeqquteqaateqarsimavoq.

Ineqarnermut Attaveqarnermullu Naalakkersuisup ulloq 17.5.2004 akissutaa Aningaasaqarnermut Ataatsimiititaliap tusaatissatut tiguaa, ilaqutariinnulli illut niuerfimmi akigititamit appasinnerusumik akilersillugit tunineqarnissaat siunertarineqarsimanngitsoq paasillugu. Inissiat ilaannut teknikikkut aningaasatigullu naliliinissap pisariaqarsinnaanera paasinarpoq. Ilaqutariinnulli illunut tunngatillugu illunik tuniniaasartut aqqutigalugit niuerfimmi akigititat atorlugit tunineqarsinnaanerat pissusissamisoortuussaaq.

Taamatut periuseqarneq Ineqarneq pillugu aalajangersakkami 2002-meersumi imm. 12.5-imut  Inissianik tunisineq -   naapertuutissaaq. Inissianik tunisinermi Namminersornerullutik oqartussat pitsaanerpaamik iluanaaruteqarnissaat sapinngisamik qulakkeerneqassasoq tassani allassimavoq.

Taamaattumik sulisunut illut attartortumit piginnittumut aaqqissuussinermut piaartumik ilaajunnaarsinneqarnissaat siunertaralugu Naalakkersuisut peqqussutip allanngortitsinissaa siunertaralugu sulisuteqassasut Aningaasaqarnermut Ataatsimiititaliap kaammattorumavai. Siunnerssuutissatut kissaatigineqartoq Naalakkersuisunit UKA 2004-mi saqqummiunneqassasoq kissaatigineqarpoq, taamaalilluni siunissami Namminersornerullutik Oqartussat pigisaat nalillit niuernermi akigititat ataallugit tunineqartarnerisa unitsinneqarnissaat qulakkeerneqassammat.

Allannguutit naammassineqarnissaasa tungaannut ullumikkutut atugassaqartitsilluni illuutinik tunisisoqanngikkallassasoq Naalakkersuisut qinnuigineqarput.¿

Tamatuma kingorna suliaq pillugu maanna taamanilu Aningaasaqarnermut Ataatsimiititaliaasut Naalakkersuisunit saaffigineqaqqinngillat.

Tassunga atatillugu Aningaasaqarnermut Ataatsimiititaliap paasivaa apeqqummut 5-imut akissutip ataani § 36 naapertorlugu apeqqummut akissutikkut aallarniutitut taaneqartukkut Naalakkersuisut paasissutissiisimasut ulloq 17. maj 2004-mi Naalakkersuisunit akissutip siusinnerusukkut taaneqartup ataatsimiititaliamit tiguneqarneraniilli Aningaasaqarnermut Ataatsimiititaliaq suliami tassani Naalakkersuisunut saaffiginneqqissimanngitsoq. Siuliani issuaanikkut uppernarsarneqarpoq Naalakkersuisut pisimasunik nassuiaataat tamakkiisuunngitsoq.

Paasissutissanik annertunerusunik pissarsinissaq kissaatigineqarpat Aningaasaqarnermut Ataatsimiititaliap ilaasortai mailit oqaraasuaatillu normui ataani allattorsimasut atorlugit saaffigineqarsinnaapput:

Augusta Salling (Siulittaasoq) tlf.: +299 55 03 10 eller e-mail aus@atassut.gh.gl

Doris Jakobsen (siulittaasup tullia) tlf.: +299 53 91 13 eller e-mail doja@gh.gl.

Jens Lars Fleischer tlf. +299 54 91 60 eller e-mail jefe@uummannaq.gl

Johan Lund Olsen tlf. +299 55 54 85 eller e-mail johan@gh.gl

Lene Knüppel tlf. +299 49 11 66 eller e-mail lekn@gh.gl.

Augusta Salling

Aningaasaqarnermut Ataatsimiititaliap siulittaasua