2024 2023 2022 Flere år...
09-11-2007
Inatsisartunut ilaasortat suliarinninnermi peqataasinnaanerannut apeqqut pillugu tusagassiortunut nalunaarutaa.
Suliassalli suliarineqartarnerat pillugu Inatsisartut inatsisaat Inatsisartunut atuutinngilaq. Illuani Inatsisartut illuanilu Naalakkersuisut kommunillu akornanni suliassanik agguaasarnermut tamanna tunngassuteqarpoq. Inatsisartut inatsisiliorneq suliassaraat, Naalakkersuisulli kommunillu inatsisit atuunnerinik aqutsisuullutik, tamatumunnga atasumik inatsisit atuuttut tunngavigalugit suliassanik aalajangiisartuullutik.
Taamaammat inatsisit tunngaviusut, qinersisarnermut inatsit, Inatsisartut Naalakkersuisullu pillugit Inatsisartut inatsisaat imaluunniit Inatsisartut suleriaasiat suliami peqataasinnaannginnermut maleruagassanik imaqanngillat.
Inatsisissatut siunnersuut inatsisartunut ilaasortamut pineqartumut aningaasaqarnikkut tigussaasunik iluaqutissartaqarlunilu akornutissaqaraluarpalluunniit inatsisartunut ilaasortaq inatsisissatut siunnersuutip akuersissutigineqarnerani itigartinneqarneraniluunniit taamaalilluni peqataasinnaavoq.
Ataatsimiititalianuttaaq tunngassutilinni inatsisartunut ilaasortaq suliami peqataasinnaanngitsutut nalinginnaasumik isigineqarsinnaanngilaq. Ataatsimiititaliamut ilaasortatut pineqartup inuttaanut qanittumik sulianik attuumassutilinnik ataatsimiititaliamit aalajangikkani, assersuutigalugu inatsisartunut ilaasortap inatsisitigut malersorneqarsinnaannginneranik atorunnaarsitsinissamik ataatsimiititaliaq inassuteqartillugu, imaluunniit suliami, ilaasortamut aningaasaqarnikkut toqqaannartumik salliutitsisutut inerneqartumi Aningaasaqarnermut Ataatsimiititaliaq aalajangiisussaatillugu, Inatsisartunut ilaasortaq suliamik suliaqarnermi peqataasinnaanngitsutut isigissallugu immikkorluinnaq ittumik pissutissaqarsinnaammat mattutivinneqarsinnaanngilaq. Apeqqulli nalorninartortaqarpoq, pisariaqarpallu inatsisilerinikkut sukumiisumik naliliisoqartariaqarluni. Tamanna manna tikillugu pisariaqartarsimanngilaq.
Taamaakkaluartoq Inatsisartunut ilaasortap pineqartup nammineerluni soqutigisaqarfianik suliamik suliaqarnermi inatsisartunut ilaasortaq nammineerluni peqataajumanani aalajangersinnaavoq. Ataatsimiititaliamili amerlanerussutillit ikinnerussutillilluunniit inatsisartunut ilaasortaq taamaalioqqullugu pinngitsaalisinnaanngilaat. Suliamik aalajangersimasumik ataatsimiititaliami suliaqarnermut atatillugu apeqqut takkutissagaluarpat Inatsisartut Siulittaasoqarfiannit aalajangiiffigisassatut apeqqummik ataatsimiititaliaq saqqummiisinnaavoq.
Namminersornerullutik Oqartussat kommunillu illuutaannik tunisinernut atatillugu ¿Attartortumiit piginnittuunermut aaqqissuussinertut¿ taasami tusagassiuutit eqqarsaatersornernut atasumik Kukkunersiuinermut Ataatsimiititaliami ilaasortat arlallit suliani peqataasinnaannginnerannik isummertoqartarnera tusarsaasimavoq. Apeqqummik suliarinninnermi peqataasinnaannginnermik ajornartorsiortoqanngitsoq Kukkunersiuinermut Ataatsimiititaliap isumaqatigiittup tassunga atatillugu paasigaa erseqqissarneqassaaq.
Tusagassiuutini eqqarsaatersornerit qulaani taaneqartut pillugit inatsisartunut ilaasortat ataasiakkaat peqataasinnaanerinik naliliisoqaqqullugu saaffiginnissummik Inatsisartut Siulittaasoqarfiat tigusaqarsimanngilaq.
Inussiarnersumik inuulluaqqusillunga
Jonathan Motzfeldt
Inatsisartut siulittaasuat