Nutaarsiassat

Inatsisartut ataatsimiittarfiannik nutaamik sananissaq Inatsisartut Suleriaaseq pillugu Ataatsimiititaliaata novembarip 6-at 2007 ataatsimiinnermini taamaatippaa. (Suliassaq nr. 060.10.019)

Taamatut aalajangernerup kinguneratut aningaasaliissutitut qinnutigineqartoq 2008-mi 0-inngorlugu appartinneqassaaq.

Suliassap taamaatinneqarnissaanik Inatsisartut aalajangerpata siusinnerusukkut aningaasaliissutit, Sanaartornermut Iluarsartuussinermullu Aningaasaateqarfimmi aningaasat suliassamut atugassat atunngitsuukkat konto pingaarneq 80.00.10-mut, Sanaartornermut Iluarsartuussinermullu Aningaasaateqarfimmit 2007 naatinnagu utertitassat nuunneqassapput.

Atuarfiit isumaginninnikkullu sullissiviit allileriffigineqarnissaannut sanaartugassanut atugassat iluini aningaasanik atugassanngortitsinissamik Siulittaasoqarfiup taamatullu Naalakkersuisut ataatsimoortumik naalakkersuinikkut kissaataat tunngavigalugit Siulittaasoqarfik suliassamik taamaatitsivoq. Aningaasat allannguutissatut siunnersuutikkut tassuuna atorneqarsinnaalersut taamaalillutik siunertanut taaneqartunut taamaallaat atugassatut isigineqassapput.

Suliassap taamaatinneqarneratigut Inatsisartut atortorissaarutaasa annertusineqarnissaannik aalaja-ngernermi naatsorsuutigineqartumit ullumikkut atuuttumit allaasunik Inatsisartut allaffeqarfiat partiillu qinigaatitaat allaffinnik atortorissaaruteqarnikkut annertusaavigineqarnissaat qulakkiissallugu pisariaqalissaaq. Ulloq decembarip 31-at 2007 allaffinnik init tamakkerlugit Inatsisartut Allaffeqarfiannut atugassanngortinneqarnissaat taamaalilluni matumani pineqartumik aningaasaliinerup appartinneqarnissaa paasilluarneqarsinnaavoq. Init ilaat ataasiakkaat ullumikkut Naalakkersuisut allattoqarfiannit atorneqarput.