2024 2023 2022 Flere år...
25-04-2007
Immikkoortoq UPA2007/9 pillugu tusagassiutitigut nalunaarut.
Avataasiorluni aalisarnermik nakkutilliineq pillugu nalunaarummik nr. 33, 18. decembari 2006-imeersumik tunuartitsinissaq pillugu siunnersuummik UPA 2007/9-mik Inatsisartut suliarinninnerat.
Marlunngorneq ulloq 24. apriili 2007 Aningaasanut Nunanullu Allanut Naalakkersuisoq Josef Motzfeldt unnukkut radioaviisimi oqaaseqarpoq Inatsisartut Suleriaasiata § 50-ia naapertorlugu ullormut oqaluuserisassani immikkoortup tullianut ingerlaqqinnissamik taasisitsinermi Inatsisartuni amerlanerussutillit, taakkununnga ilaalluni Inatsisartut Siulittaasuat, Inatsisartut Naalakkersuisullu akornanni suliassanik agguataarineq atuuttoq sanioqqukkaat, taamaalillunilu takutinneqartoq amerlanerussutillit taakku Inatsisartut Naalakkersuisullu pillugit inatsit ataqqinngikkaat. Inatsisartunut ilaasortap Johan Lund Olsenip ullormut oqaluuserisassani immikkoortup tullianut ingerlaqqinnissamik siunnersuutaa ilanngullugu nassiunneqarpoq.
Naalakkersuisoq Josef Motzfeldtip oqaaserisai tunngavissaqanngillat, taamaallaallu naalakkersuinikkut eqqissiviilliortitsinermik kinguneqarsinnaallutik.
Naalakkersuisoq Josef Motzfeldtip oqaaseqaataani pingaartinneqarpoq Naalakkersuisut nalunaarutiliornissamut pisinnaatitaanerata ataqqineqarnissaanik apeqqut. Taasisitsinermi pineqartumi taanna taasisitsissutigineqanngilaq. Taasisitsinermi pineqarpoq ullormut oqaluuserisassani immikkoortup tullianut ingerlaqqinnissamik apeqqut, taannalu akuersissutigineqarpat Avataasiorluni aalisarnermik nakkutilliineq pillugu nalunaarummik nr. 33, 18. decembari 2006-imeersumik Naalakkersuisut tunuartitsinissaannik siunnersuutip atorunnaarnera tamatuma kingunerissallugu.
Ullormut oqaluuserisassani immikkoortup tullianut ingerlaqqinnissamik Inatsisartunut ilaasortaq Johan Lund Olsenip siunnersuutaanut amerlanerussutillit, Inatsisartunut ilaasortat 17-it, 12-it illuatungeralugit, akerliullutik taasinermikkut taamaalillutik akuersissutigaat nalunaarummik oqaatigineqartumik Naalakkersuisut tunuartitsinissaannik siunnersuutigineqartoq tunuartinneqassanngitsoq, akerlianilli Inatsisartut maannakkut ataatsimiinnerini nangillugu suliarineqassasoq.
Ullormut oqaluuserisassani immikkoortoq 2007/9-mik suliaqarnermi Naalakkersuisup, Josef Motzfeldtip oqaatigisaatut, Naalakkersuisut nalunaarutiliorsinnaanerat taasissutigineqarsimanngilaq. Naluneqanngitsutut siunnersuummut tunngavilersuut taasissutigineqarneq ajorpoq. Naalakkersuisup taama oqarnera ilisimareeraluarlugu tamanna oqaatigineqarsimasinnaavoq, imaluunniit Inatsisartut Suleriaasianni § 50 malillugu taasissutigisap suuneranik paasinnissimannginneq patsisaasimasinnaavoq.
Naalakkersuisut nalunaarutiliaannik pineqartumik suliarisap tunuartinneqarnissaanik allanngortinneqarnissaanillu siunnersuut Inatsisartut Naalakkersuisullu suliassanik agguataarinerannut akerliusoq radioaviisimi ilanngussami Naalakkersuisoq Josef Motzfeldt oqarmat, imaassinnaavoq tamanna inatsisitigut inissisimanermik paatsuinerusimasinnaasoq, imaluunniit ilisimareeraluarlugu oqarnerusimasimasinnaasoq. Naalakkersuisut nalunaarutiliorsinnaanerattut oqaatigineqartoq tamatigut Inatsisartunit pisinnaatitsinermik tunngaveqartarpoq. Nalunaarummik qanorluunniit ittumik atuu-tilersitsineq pissusissamisuunngitsumik nalunaarutiliornerusoq Inatsisartut isummerpata, Naalakkersuisut nalunaarummik tunuartitsinissaannik Inatsisartullu naliliinerat naapertorlugu pisinnaatitsinerup iluani pissusissamisoornerusumik nalunaarutiliornissamik Inatsisartut peqqusisinnaanerat qularutissaanngilaq.
Ulluinnarni sulinermi takornartaviunngilaq Naalakkersuisut nalunaarutiliaanni maleruagassatut aalajangersagassat pillugit aalajangiiffigisassatut siunnersuutinik Inatsisartunut ilaasortat saqqummiussisarnerat. Siunnersuutinut taamaattunut assersuutitut kingullertut taaneqarsinnaasut tassaapput UKA 2006/136 aamma UKA 2005/6.
UKA 2006/136: Kommunalbestyrelsinut nunaqarfinnilu aqutsisunut ilaasortanik il.il. kiisalu borgmesterinik borgmesterillu tulliinik akissarsiaqartitsineq pillugu Namminer-sornerullutik Oqartussat nalunaarutaa nr. 35, 5. oktober 2001-meersup allannguiffigineqarnissaanut siunertaqartumik suliniuteqarnissamik, Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Olga Poulsen Berthelsen, Inuit Ataqatigiit)
UKA 2005/6: Efterskolertunut tapiissuteqartarnermi ilinniartut ilinniakkaminnit pissarsiaat apeqqutaatinnagit tapiissuteqartalernissaq Namminersornerullutik Oqartus-sat nalunaarutaanni nr. 26, 16. januar 2004-meersumi § 1 imm. 2 litra 7-ip aamma § 3-p peerneqarnissaannik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.
(Inatsisartunut ilaasortaq Marie Fleischer, Demokraatit)
Nalunaarummi maleruagassatut aalajangersakkanik allanngortitsinissamik siunnersuutit Inatsisartut Suleriaasianni § 32, imm. 3, 3), siunnersuutinut tunngaviusumik pingaarutilinnut Inatsisartunillu aalajangiisuusumik aalajangigassanut tunngasoq, naapertorlugu saqqummiunneqartarput. Siunnersuut Naalakkersuisumit Josef Motzfeldtimit uparuarneqartoq Inatsisartut Allattoqarfianni inatsisinik nalilersuisarfimmi misissorneqarsimavoq. Siunnersuutip suliarineqarneranut atatillugu Inatsisartuni amerlanerussutillit Inatsisartulluunniit Siulittaasuat isornartorsiussallugit pissutissaqanngilaq.
Piffissami akunniliuttumi Inatsisartut Aalisarnermut, Piniarnermut Nunalerinermullu Ataatsimiititaliaanni suliarineqareeruni siunnersuut ulloq 30. apriili 2007 aappassaaneerneqassaaq.
Jonathan Motzfeldt
Inatsisartut siulittaasuat