2024 2023 2022 Flere år...
22-10-2007
Nunaqarfinni aqutsisut attatiinnarneqassapput, najukkanilu siunnersuisoqatigiit taamaatinneqassallutik.
Siunnersuutit taakku marluk pillugit Aaqqissuusseqqinnissamut Ataatsimiititaliaq ullumi nalunaarutinik saqqummiussaqarpoq. Nalunaarutit tamarmik ataatsimiititaliamit isumaqatigiittumit saqqummiunneqarput, tassa ataatsimiititaliap inassuteqaatai Inatsisartuni partiinit tamanit taperserneqarlutik.
Kommuninik aaqqissuusseqqinneq innuttaasunut aammalu siunissami naapitassanut nunatta piareersimanissaanut assut pingaaruteqarpoq. Aaqqissuusseqqinneq taama annertutigalunilu pingaaruteqartigisoq sapinngisamik annertunerpaamik peqataaffigineqartariaqarpoq. Taamaattumik isumaqatigiinnissap anguneqarnissaanut ataatsimiititaliami ilaasortat annertuumik piumassuseqarsimapput, ataatsimiititaliamilu isumaqatigiinniarnerit angusaqarususseqarluni nuannersumik ingerlanneqarsimallutik.
Apeqqutit ataatsimiititaliamit isummerfigineqartussat ilagisimavaat qanimut oqartussaaqataanerup sapinngisamik pitsaanerpaamik sinaakkutissaqartinneqarnissaata qanoq pilersinneqarsinnaaneranik apeqqut.
Kujataata kommuniani Qeqqatalu kommuniani kommunalbestyrelsinut ilaasortat 15-init amerlanerunnginnissaat aammalu Avannaata kommuniani aammalu Kangiata/Kitaata kommuniani 21-nit amerlanerunnginnissaat ataatsimiititaliap siunnersuutigaa. Taamaalilluni kommunerujussuit sisamaasut innuttaqassutsimikkut il.il. assigiinngissuseqarnerat ilanngullugu sillimaffigineqarpoq.
Nunaqarfinni aqutsisut attatiinnarneqarnissaat ataatsimiititaliamit inassutigineqarpoq, taamaattorli iluarsaqqinneqarlutillu pisariillisaavigineqarlutik. Taamaalilluni nunaqarfinni aqutsisut affaannanngorlugit ikilisinneqassasut naatsorsuutigineqassaaq, tassa nunaqarfiit sanileriit ataatsimoorussamik aqutsisunik pilersitsinissamut periarfissinneqassammata.
Nunaqarfimmi aqutsisut attatiinnarneqarnissaannik siunnersuut maannalu kommuniusut kommunerujussuanngortussat kommunalbestyrelsiini ilaasortaatitaqarnissaannik qulakkeerinninneq tunngavigalugu najukkani siunnersuisoqatigiinnik pilersitsinissamut naammattumik tunngavissaqanngitsoq ataatsimiititaliaq isumaqarpoq
Ataatsimiititaliamit nalunaarutit marluk ulloq 6. november Inatsisartunit suliarineqassapput.
Lars-Emil Johansen
Inatsisartut Aaqqissuusseqqinnissaq pillugu Ataatsimiititaliarigallagaata siulittaasua