2024 2023 2022 Flere år...
12-04-2007
Aaqqissuussaanermut Ataatsimiititaliap Kommuninik iluarsartuusseqqinneq pillugu tusagassiutinut nalunaarutaa.
Borgmester Simon Simonsen pakatsinissamut pissutissaqanngilaq. Kommuninik iluarsartuusseqqinneq qaqugu ingerlanneqassanersoq Inatsisartut maannakkut ataatsimiinnerminni isummerfiginngilaat.
Naluneqanngitsutut nunatsinni borgmesterit kommuninik iluarsartuusseqqinnerup 2010-mi januaarip aallaqqaataanut kinguarteqqullugu ammasumik allagaqarlutik Naalakkersuisunut Inatsisartunullu ilaasortanut kaammattuutigaat.
Kommuninik annertuumik iluarsaaqqinnerup ippassaq Inatsisartunit akuersissutigineqarneranut atatillugu borgmesterit kaammattuuttaannik Inatsisartut soqutiginninngimmata borgmester Simon Simonsen, Qaqortoq ullumi radioavisimi pakatsisimanerarpoq.
Tamannali nassuiaatissaqarluarpoq.
Ataatsimiinnerni matumani Naalakkersuisut Inatsisartunut isummerfigisassanngortitaat tassa, siullermik, kommunit sorliit kattussuunneqassanersut, aappassaannillu, kommunit kattussuusseqarnissaat qaammatinik ima imalu amerlassusilinnik sioqqullugu kommunerujussuarni kommunalbestyrelsitut oqaatigineqarsinnaasunik, piffissamut ikaarsaarfiusumut pilersinneqartussanik ataatsimiititaliornissamik apeqqut.
Kommuninik iluarsartuusseqqinneq soqutiginartunik pingaartunillu allarpassuarnik, pissutissaqarluarluni oqaluuserineqarsinnaasunik ilaqarpoq, taakkuli oqallinnermi pineqartumi Inatsisartunit sammineqanngillat.
Saaffiginnissut borgmesterineersoq maluginiarneqarsimammat erseqqippoq. Borgmesterit saaffiginnissutaat taannarpiaq tunngavigalugu Naalakkersuisut Siulittaasuannut, Hans Enoksenimut, apeqqutinik arlalinnik Inatsisartut Aaqqissuusseqqinnermut Ataatsimiititaliaat nassiussisimammat ilisimatitsissutigisinnaavara. Borgmesterinit kissaatigineqartut ¿ taakkununngalu ilanngullugu kommunit iluarsartuuteqqinneqarnerisa kinguartinneqarnissaanik kissaat ¿ kommunit iluarsartuuteqqinneqarnerannut tunngasut pillugit Inatsisartut Naalakkersuisullu akunnerminni ingerlaavartumik oqaloqatigiissutaannut taamaalillutik ilaasussaapput.
Kommuninik iluarsartuusseqqinnerup kinguartinneqarsinnaanera pillugu Aaqqissuusseqqinnermut Ataatsimiititaliaq borgmesterinut soorunami neriorsuuteqarsinnaanngilaq. Borgmesterinulli qularnaatsumik oqaatigisinnaavara kissaatigisaat tusaaniarneqarsimasut, ippassarlu inatsisartutigoortumik Inatsisartut aalajangigaat marluk kissaatinik taakkunannga itigartitsinermik imaqanngimmata.
Kommuninik nutaamik iluarsartuusseqqinneq qaqugu atuutilissasoq pillugu inaarutaasumik aalajangerneq inaltsisissatut siunnersuutit pisariaqartut Inatsisartunit oqaluuserineqarnerinut atatillugu aatsaat piumaarpoq ¿ tassalu 2007-imi ukiakkut ataatsimiinnermi aamma 2008-imi upernaakkut ataatsimiinnermi.
Inussiarnersumik inuulluaqqusillunga
Agnethe Davidsen
Inatsisartut Aaqqissuussaanermut Ataatsimiititaliaannut siulittaasoq