2024 2023 2022 Flere år...
16-05-2007
Inatsisartut Nunanut Allanut Sillimaniarnermullu Ataatsimiititaliaat Naalagaaffiit Peqatigiinni Permanent Forumimiipput
Ataatsimiititaliap Permanent Forumimi ilaasortat naapippaat danskillu Naalagaaffiit Peqatigiinni immikkoortortaani Naalagaaffiit Peqatigiinni aaqqissuusseqqinnissaq pillugu ilisimatitsiffiusumik ataatsimeeqateqarluni, kiisalu Inuit Pisinnaatitaaffii pillugit siunnersuisoqatigiinnut qinersinissamut qineqqusaarnertik ilisimatisissutigalugu. Ataqqinaammik konsuleqarfimmit ataatsimiititaliaq avammut tunisinerit pillugit il.il. ilisimatitsiffiusumik ataqqinaammik konsulimit Torben Gettermanimit ataatsimeeqateqarpoq.
Marlunngorneq ulloq 15. maj ataatsimiititaliamut ilaasortaq Marie Fleischer Danmarki Kalaallit Nunaallu sinnerlugit Naalagaaffiit peqatigiiffiinut Nunat Inoqqaavisa Permanent Forumianut oqalugiarpoq. Tassani Permanent Forumip ataani suliniutaasut tapersersorlugit saqqummiuppaa. Tassunga atatillugu nunat inoqqaavisa pisinnaatitaaffii pillugit nalunaarutip qanittumi akuerineqarnissaata pingaaruteqarnera erseqqissarpaa.
Marie Fleischerip silap pissusaata allanngoriartornera issittumi nunat inoqqaavisa inooriaasiannut sunniukkiartulereersoq maluginiaqquaa. Silap pissusaata allanngoriartornerata kingunerisaanik pingaarutilerujussuarmut unamminartumullu suleqatigiinnerunissaq kaammattuutigaa. Silap pissusaata allanngoriartornera Permanent Forumimi arlaanni immikkut sammineqarsinnaasoq ilaatigut eqqaavaa. Marie Fleischerip Kalaallit Nunaata Danmarkillu akornanni namminersulivinnissamut isumaqatigiinniarnerit ingerlasut oqaluttuarai.
Oqalugiaat tigulluarneqarpoq, Permanent Forumillu siulittaasuata Victoria Tauli-Corpuzip akissuteqarnermini ataatsimiititaliap tapersersuinera qujassutigalugu kiisalu Forumip sulineranut Danmarkip aningaasatigut tapiissuteqarnera qujassutigalugu. Aammattaaq silap pissusaata allanngoriartornera Permanent Forumimi sammisatut qaqinneqarsinnaaneranut siunnersuut ammaffigalugu.
Permanent Forumimi aallartitat Ambassadør Tyge Lehmanimit aqunneqarput, taassumalu inuit pisinnaatitaaffii nunallu inoqqaavi immikkut ilisimasaqarfigai, taamatuttaaq nunatsinni namminersulivinnissamut isumaqatigiinniarnerit sullitaralugit.
Aallartitat ulluni maajip 13-anit 16-anut 2007 New Yorkimiipput. Angalanermi Inatsisartut Nunanut Allanut Sillimaniarnermullu Ataatsimiititaliaanit peqataapput:
Inatsisartunut ilaasortaq Thomas Kristensen, siulittaasoq (Atassut)
Inatsisartunut ilaasortaq Marie Fleischer (Demokraatit)
Oqalugiaat tusagassiuutitigut nalunaarummut matumunnga ilanngunneqarpoq. Paasissutissat annertunerusunut ataatsimiititaliap siulittaasua Thomas Kristensen oqarasuaatikkut +299 59 84 26-ikkut attavigalugu pissarsiarineqarsinnaapput.