2024 2023 2022 Flere år...
13-12-2007
Atuakkat pingasut nunat avannarliit killiit meeqqanut atuakkianut Akissarsisitsisarneranut inassutigineqartut
Piukkussinermut tunngavilersuummini naliliisutut komitii ilaatigut ima oqarpoq:
Atuagaq qangalili utaqqineqarsimavoq. Atuakkap nunarsuami amerlasuunngortitassatut allagaanera iluatsilluarsimavoq, peqatigisaanillu kulturikkut immikkuullarsissuunermigut ilisarnarluni.
Atuakkap atuarneragut oqaatsinik pinnguarnissaq pilerinartuuvoq. Atuakkamik qalipaatigissaaqisumik pilersitsineq iluatsissimavoq aammalu atuakkiortoq assiliartalersuisorlu asseqanngitsumik suleqatigiilluarsimallutik. Atuagaq kalaallisut taallatut isumaqanngitsutut naqinnerillu atorlugit naggateqatigiiaagaasutut quianartuulluni immikkuullarissuuvoq.
Atuagaq Appollonia Edward Fulgømit atuakkiarineqarlunilu assiliartulersugaasoq Savalimmiuni naliliisutut komitiimit inassutigineqarpoq. Islandimiut naliliisutut komitiiata atuagaq Spøgelsesspor, Helga Gunnardóttirimit atuakkiarineqartoq Akissarsisitsinissamut inassutigaat. Atuakkat taakku ilaat ataaseq 2008-mi aggustimi Nunat Avannarliit Killiit siunnersuisoqatigiivisa Meeqqanut inuusuttunullu atuakkiap Akissarsiassartaanik tunineqassaaq. Akissarsiassaq danskit aningaasaannik 60.000-nik angissuseqarpoq.
Akissarsisitsineq ukioq allortarlugu tunniunneqartarpoq Akissarsiassamullu maannakkut sisamassaannik piukkussanik toqqaasoqarluni. Periuserineqartoq tassaavoq, Savalimmiuni, Kalaallit Nunaanni Islandimilu nunani naliliisutut komitiit Akissarsiap tunniunneqarnissaa ukiumik ataatsimik sioqqullugu decembarip qaammataani, nunani tamani atuakkamik ataatsimik, piukkutanik toqqaasarlutik. Nunani avannarlerni killerni aalajangiisutut komitii tamatuma kingorna atuakkat taakku pingasut ilaannik ataatsimik ukiumi tullermi aggustip qaammataani Akissarsiamik pissarsissussatut toqqqaasarpoq.
Nunani Avannarlerni Killerni atuakkiorneq tapersersussallugu atuakkiortullu meeqqanut inuusuttuaqqanullu atuakkanik pilersitsinissamut piginnaasaminnik atuinissaannut qiimmassarlugillu kaammattussallugit Nunat Avannarliit Killiit siunnersuisoqatigiivini Meeqqanut inuusuttuaqqanullu atuakkianik Akissarsisitsisarnerup siunertaraa. Siunnersuisoqatigiinnittaaq malunnartissallugu kissaataavoq Nunat Avannarliit Killiit tassaammata imminnut ataqatigiiusut.
Akissarsisitsinerli ingerlariaqqinnissamut kajumissaataaginnanngilaq. Aammattaaq tassaavoq ataqqinaat pitsaassusissamullu uppernarsaat, aaqqissuussamik atuakkanik akissarsisitsisarnernut allanut, soorlu assersuutigalugu Nunat Avannarliit Siunnersuisoqatigiivisa atuakkiortunut Akissarsisitsisarnerannut assersuunneqarsinnaasoq.
Nunatsinni aalajangiisartutut komitiimut Vera-Lise Rosing Olsen siulittaasuuvoq (allaffimmiutut ilinniagalik), nunatta atuagaateqarfiani ukiuni qulini sulisimasoq maannalu (Aalisarnermut Piniarnermullu Pisortaqarfimmi atorfilik), Varste Mathæussen Berndtsson (isiginnaartitsisartutut ilinniagalik, Ilisimatusarfimmi atuartoq) aamma Erika Nielsen Baadh (atuagaateqarfilerinermut ilinniagalik, Groenlandicami pisortaq).
Siusinnerusukkut Akissarsisinneqarsimapput:
2002. ¿Sagan af bláa hnettinum¿Andri Snær Magnasonimit.
2004 ¿Engill í vesturbænum¿Kristín Steinsdóttirimit aamma Halla Sólveig Þorgeirsdóttirimit.
2006 ¿En hund, en kat og en mus¿Bárður Oskarssonimit.
Paasisaqarnerujumasut saaffiginnissinnaapput: Siunnersuisoqatigiit allattaat Thordur Thorarinsson, oqarasuaat. 00354 5630731, tt@althingi.is
Nunatsinni aalajangiisutut komitiimut siulittaasoq, Vera Lise Rosing Olsen, oqarasuaat. +299 254955
Piukkussanut tunngasut uani atuarneqarsinnaapput: www.vestnordisk.is
Nunat Avannarliit Killiit Meeqqanut inuusuttuaqqanullu atuakkianik Akissarsisitsisarnermut aalajangersakkat uaniipput: http://www.vestnordisk.is/id/1000103