Nutaarsiassat

23-01-2007

Inuusuttut Inatsisartuisa Ilinniartitaanermut Ataatsimiititaliaata tusagassiuutitigut nalunaarutaa

Meeqqat atuarfianni ilinniartitsisut atuartullu ataatsimoortumik pissusilersornissaannut malittarisassaqalernissaata qulakkeerneqarnissaa pillugu Aqutsisut peqquneqarnissaannik Inuusuttut Inatsisartuisa aalajangiiffigisassaattut siunnersuut, Peqqissaanermik Ilinniarfiammeersoq (II 2007/19) Inuusuttut Inatsisartuisa Ilinniartitaanermut Ataatsimiititaliaata allannguutissatut siunnersuuteqarfigaa.

Ilinniartitsisut ilinniartitsisunullu taartaasartut nuannaartorisaanerisa, maligassiuinerillu pitsaasut pitsaanngitsullu meeqqanit ilikkarneqartarneri malugineqartarnerilu ajornartorsiutaammata ataatsimiititaliap paasilluarsinnaavaa. Taamaammat akaareqatigiinnissaq pisariaqarluinnarpoq.

Meeqqat atuarfianni ilinniartitsisut atuartullu pissusilersornermut maleruagassaannut piumasaqaatit mikinnerpaaffissaannik aalajangersaasoqassasoq kiisalu ilinniartitsisumut taartaasup atuartitsineranut killissarititat piumasaqaatillu miinnerpaaffissaat nuna tamakkerlugu aalajangersarneqassasut ataatsimiititaliap siunnersuutigaa.

Piumasaqaatit aalajangersimasut siunnersuutaapput:

• Ilinniartitsisumut taartaasup ilinniagassani sorlerni piginnaasaqarluarnera kiisalu tamatuma kingorna ilinniartitsisunut taartigisat agguataarneqarnerat pillugu atuarfiit piginnaasaqarfinnik qulaajaassasut.
• Nalunaaquttap akunnerani ilinniagassanut aalajangersimasunut immikkut ilisimasaqalernissamut piareersaataasumillu ilinniartitsisumut taartaartaasartoq pikkorissarneqartassasoq.
• Ilinniartitsisumut taartaasumut ilinniartitsisut pilersaarusiortassasut kiisalu, suliassanik klassinut agguataakkanik, kiisalu atortussat suut atuarfimmit pigineqarnersut pillugit nalunaarsuummik iliinniartitsisup taartaanut takussutissiamik tigoriaannarmik ilinniartitsisumut taartaasup mappianik suliaqartassasut.

Ataatsimiititaliap ilaasortarai:

Inuusuttut Inatsisartuinut ilaasortaq Jane Petersen, ilinniarnertuunngorniarfik Aasiaat, siulittaasoq

Inuusuttut Inatsisartuinut ilaasortaq Ivalo Thorin, Perorsaanermik ilinniarfik, siulittaasup tullia

Inuusuttut Inatsisartuinut ilaasortaq Norsaq Mathæussen, Issittumi ingeniørit

Inuusuttut Inatsisartuinut ilaasortaq Maalia Kleist, ATI

Inuusuttut Inatsisartuinut ilaasortaq Susanne Egede Jeremiassen, Niuernermik Ilinniarfik, Qaqortoq

Inuusuttut Inatsisartuinut ilaasortaq Aqissiaq Sinclair Ström, Issittumi ingeniørit

Annertunerusumik paasisaqarusuttut ataatsimiititaliap siulittaasua Jane Petersenimut, oqarasuaat. 48 61 62-imutimaluuniit 26 16 08-imut, sianersinnaapput.