Nutaarsiassat

Taamatut ataasiarluni pisoqarsimasoq tusatsiarneqarsimavoq, taamaammallu Inatsisartut Siulittaasuannit pilertortumik erseqqissumillu oqaaseqarnissaq pisariaqarsimavoq ¿ ilaatigut qarasaasiakkut taasisitseriaatsimik atuinermut maleruagassat atuuttut qularutigineqartariaqanngimmata ilaatigullu maleruagassat taakkua eqqutsinneqarnissaat qulakkeerneqartariaqarmat.

Tusatsiakkalli piviusumik tunngaveqartutut ilimagissallugit erseqqissumik tunngavissaqanngitsoq allakkanni erseqqissaatigaara.

Ullumi KNR-ip oqallittarfiatigut Inatsisartunut ilaasortaq aalajangersimasoq pasilliutinik saqqummiussiffigineqartoq maluginiarpara. Pasilliutit taamaattut sakkortunerpaamik akerlilertariaqarpakka. Erseqqissumik ilisimanngilarput maleruagassat unioqquTINNEQARSIMANERSUT, taamaattoqarsimassappallu taakkua KIA unioqqutissimanerai.

Inatsisartut maleruagassaat unioqqutinneqarpata, kina maleruagassanik unioqqutitsisimanersoq nalunaarlugu, Inatsisartut Siulittaasoqarfiannut naammagittaalliornissamut kinaluunniit periarfissaqarpoq. Taasisitseriaatsimik akuerisaanngitsumik atuineq pillugu naammagittaalliuutinik Siulittaasoqarfik QANOQ ILISUKKULLUUNNIIT tigusaqarsimanngilaq.