2024 2023 2022 Flere år...
29-04-2008
Kalaallit Nunaata silaannartaanik atuisinnaanermut isumaqatigiissut ersarissumik paasisaqarfigineqarnissaa pillugu Inatsisartut Nunanut Allanut Sillimaniarnermullu Ataatsimiititaliaata Naalakkersuisunut ilaasortaq isumasioqatigiilluni ataatsimiinnissamut aggersarpaa
Itillimi nalunaarut aalajangersimasumik atortinneqartuaannarnissaa Ataatsimiititaliamit pingaaruteqartorujussuartut isumaqarfigineqarpoq, taamaalilluni paasissutisseeqatigiittarnerit, oqaloqatigiittarnerit ilisimasanillu avitseqatigiittarnerit Danskit Naalakkersuisuisa Namminersornerullutillu Oqartussat akornanni naligiissumik attatiinnarneqarsinnaaqqullugit.
Nunat allamiut Kalaallit Nunaata silaannartaanik atuisarsimanerannut minnerunngitsumillu CIA-p tigusanik assartuinerminut atatillugu qanoq annertugisumik Kalaallit Nunaata silaannartaanik atuisimanera pillugu arlaannaannulluunniit attuumassuteqanngitsumik ullumikkut killiffik pillugu misissuisoqarnissaa isumasioqatigiilluni ataatsimiinnermi Inatsisartut Nunanut Allanut Sillimaniarnermullu Ataatsimiititaliaata piumasarissavaa. 2008-p aallartinnerani Nunanut Allanut Naalakkersuisoq isumasioqatigiilluni ataatsimeeqatigineqarnerani pissutsit pillugit arlaannaannulluunniit attuumassuteqanngitsumik misissuisoqarnissaa ataatsimiititaliamit kaammattuutigineqarpoq. Kalaallit Nunaannut silaannartaanullu atatillugu timmisartuussisarnerni inuillu pisinnaatitaaffii pillugit isumaqatigiissutit eqqortinneqassasut tassunga atatillugu ataatsimiititaliamit oqaatigineqassaaq.
Sukumiinerusumik paasisaqarusukkaanni Thomas Kristensenimut, oqarasuaat: +299 59 84 26-mut saaffiginnissinnaapput.