Nutaarsiassat

01-09-2008

Piffissami 1.-9. september 2008 Inatsisartut Ilaqutariinnermut Ataatsimiititaliaat Danmarkimi paasisassarsiorluni angalavoq

Inuusuttut pinerlussimasut pineqaatissinneqarnissaminnullu ukiukippallaartut inuusuttullu allat pinerluttulerinermik inatsimmik unioqqutitsisut aammalu inuiaqatigiinni nalinginnaasumik ileqqorisanik malinninnissamut ajornartorsiutillit eqqarsaatigalugit kalaallit oqartussaasut qanoq pissusilersornissaannut inatsisitigut sinaakkutissat Kalaallit Nunaanni Inatsisartunit aalajangersarneqassapput.

Meeqqanut, inuusuttunut, innarluutilinnut utoqqarnullu paarineqarnissamik isumassorneqarnissamillu immikkut pisariaqartitsisunut angerlarsimaffiit assigiinngitsut arlallit Inatsisartut Ilaqutariinnermut Ataatsimiititaliaata paasisassarsiorluni angalanermini takuniassavai.

Kiisalu kalaallit Danmarkimiittut atugarliortut isumaginninnikkut suliniarfigineqarnerat pillugu Ilaqutariinnermut Ataatsimiititaliaq erseqqinnerusumik paasissutissiiffigineqassaaq. Tamassunga atatillugu ilaatigut Kofoed Skole Kalaallillu Illuat Københavnimiittoq ataatsimiititaliap takuniassavai.

Paasisassarsiorluni angalanerup ilaani Ilaqutariinnermut Peqqissutsimullu Naalakkersuisoq peqataassaaq.

Annertunerusumik paasisaqarusuttut Ilaqutariinnermut Ataatsimiititaliami ilaasortat uku attavigisinnaavaat:

Inatsisartunut ilaasortaq Emilie Olsen, Siulittaasup tullia, mobil 52 86 64

Inatsisartunut ilaasortaq Isak Davidsen, Siulittaasoq, mobil 52 09 53

Inatsisartunut ilaasortaq Otto Jeremiassen, mobil 53 31 77 

Inatsisartunut ilaasortaq Agathe Fontain, mobil 48 45 31