2024 2023 2022 Flere år...
21-05-2008
Nunat Avannarliit Killiit Siunnersuisoqatigiiffiannit tusagassiuutitigut nalunaarut
Nunat Avannarliit Killiit Siunnersuisoqatigiivisa Siulittaasoqarfiata saniatigut Europaparlamentimi ilaasortat arfineq marluk ataatsimiinnermi peqataapput. Taakku EFTA-mut, Islandimut, Schweizimut, Norgimut aammalu EØS-Joint Parliamentary Committeemut akisussaaffeqarlutik aallartitaapput. Nunat Avannarliit Killiit Siunnersuisoqatigiiffiannut pisortatigoortumik attaveqarneq aallartitat aamma akisussaaffigissagaat Europaparlamentip Siulittaasoqarfiata 2008-mi januarimi aalajangerpaa. Europaparlamentip aallartitaannut siulittaasoq tassaavoq Bilyana Raeva, Bulgariap Europaparlametimi ilaasortaatitaa. Nunat Avannarliit Killiit Siunnersuisoqatigiiffianni Siulittaasoqarfimmiipput siulittaasoq Karl V. Matthíasson altingimi ilaasortaq aammalu siulittaasup tullii Ruth Heilmann, Kalaallit Nunaanni Inatsisartut siulittaasuat, aammalu Kári P. Højgaard lagtingimi ilaasortaq.
Atlantikup avannaani angallannerup annertuseriarnera kiisalu USA-p annaassiniartartuisa Islandimiikkunnaarnerat eqqarsaatigalugit nunap immikkoortuani imaatigut annaassiniartarneq pillugu suleqatigiinneq, isumasioqatigiinneq ataqatigiissaarinerlu annertusineqassasut siulittaasoqarfiup annertuumik pingaartippaa. Aammattaaq ataatsimut sungiusaqatigiinnissamik pisariaqartitsineq siulittaasoqarfimmit erseqqissaatigineqarpoq. Europamit aallartitanut ilaasortat sammisaq annertuumik soqutiginartippaat. Imaatigut annaassiniartarneq sammisaralugu Nunat Avannarliit Killiit Siunnersuisoqatigiivisa ataatsimeersuarnissaanni junimi Savalimmiuni ingerlanneqartussami peqataanissamut aallartitat aggersarneqarput, aallartitallu akuersiniarlutik nalunaaruteqarput.
Aamma ilaatigut silap pissusaata allanngoriartornerata annertuumik sammineqartup sunniutai Issittumi aatsaat maluginiarneqarmata aammalu nunat tamarmik kiisalu EU-p Issittumi suliniuteqarnerminnik annertusarnissaat pingaaruteqartoq siulittaasoqarfiup ataatsimiinnermi erseqqissaatigaa. Siulittaasoqarfiup siunnersuutigaa
· Nunani avannarlerni imaatigut annaassiniartarneq pillugu suleqatigiinnermik issittumi nunat annertusaanerannut tapeeqataanissani EU-p isumaliutigissagaa,
· Issittormiut Siunnersuisoqatigiiffianni EU-p kommissionia peqataassasoq,
· EU allaffimmik issittumut attaveqartartumik EU-p sullinneqarnerani Issittoq pillugu paasissutissanik katersuisussamik EU-mi pilersitsissasoq,
· Issittumi ilisimatusarnerup misissuinerullu annertusarneqarnissaannut EU annertunerusumik tapeeqataassasoq.
Nunat Avannarliit Killiit Siunnersuisoqatigiiffiata siulittaasuata Karl V. Matthíassonip ataatsimiinneq kiisalu ilaasortat arfineq marluk peqataanerigut Europaparlamentip peqataalluarnera nuannaarutigalugit oqaatigaa. Nunat avannarliit killiit Issittullu unammilligassat ajornartorsiutillu nalaatassaat pillugit Europaparlamentimi ilaasortat ataatsimiinnermi peqataasut ilisimasaqarluarmata, taamaattumillu ataatsimiinnermi oqallinnerit pitsaalluinnartuummata Nunanut avannarlernut killernut tamanna immikkut iluaqutaassasoq oqaatigaa.
Nunat Avannarliit Killiit Siunnersuisoqatigiivisa aammalu Europaparlamentimit aallartitat akornanni tullianik ataatsimiinnissaq 2009-mi martsimi pisussatut pilersaarutigineqarpoq.
Nunat Avannarliit Killiit Siunnersuisoqatigiiffiat Kalaallit Nunaanni Inatsisartut, Savalimmiuni Lagtingip Islandimilu Altingip suleqatigiiffigaat.
Paasissutissat sukumiinerusut:
Thordur Thorarinsson allattaaneq, +354 563 0731.