2024 2023 2022 Flere år...
21-05-2008
Atlantikup avannaamiut annaassiniartarnikkut suleqatigiinnerat imaatigut annaassiniartarnermi pisortat, naalakkersuisut inatsisartullu oqallisigaat
Nunani avannarlerni nunat tamarmik immamik avatangiisillit Atlantikup avannaani eqqaanilu ataavartumik naleqquttumillu isumannaallisaanermi annaassiniarnermilu upalungaarsimanerat malunnaatilimmik soqutigineqarpoq. Taamaattumik Nunat Avannarliit Killiit Siunnersuisoqatigiivi ukioq kingulleq ataatsimiimmata Atlantikup avannaata eqqaani naalagaaffiit imaani annaassiniartarneq pillugu annertunerusumik suleqatigeeqqullugit kaammattorneqarput.
Atlantikup avannaani annaassiniartarnermi upalungaarsimaneq pillugu aalajangersimasumik qulequtalimmik kiisalu nunat tamalaat annaassiniartarnermi suleqatigiinnerata nukittorsarneqarnissaanut siunissami ilimagisat pillugit Nunat Avannarliit Killiit Siullersuisoqatigiivi Savalimmiuni Tórshavnimi ulluni 5. ¿ 8. juni 2008-mi isumasioqatigiissapput.
Nunani avannarlerni killerni nunallu illuatungeriit allat akornanni annaassiniartarnermi suliat pillugit isumaqatigiissutinik ataqatigiissaarinernillu kiisalu nunap immikkoortuani annaassiniartarnermi upalungaarsimanermik paasisimasaqarnerulernissaq siunertarineqartoq Nunat Avannarliit Killiit Siunnersuisoqatigiivisa siulittaasuata, Karl V. Matthíassonip oqaatigaa. Silap pissusaata allanngoriartornerata aammalu nunap immikkoortuani USA-p annaassiniartartuisa ikilinerisa kingunerisaannik nunap immikkoortuani unammilligassat ataatsimeersuarnermi aammattaaq paasisaqarfigineqassasut aamma oqaatigaa.
Ilaatigut Issittumi sumiiffinni manna tikillugu killilerujussuarmik angallaffiusimasuni aningaasaqarnikkut ingerlatat aammalu umiarsuit takornariartaatit umiarsuillu angallannerat annertusiartorput. Sikup annikillinerata kingunerisaanik angallaffigiuminarnerulernera kiisalu teknikikkut atortut pitsaanerulernerat pissutigalugit tamanna pisinnaalersimavoq. Tamatuma peqatigisaanik USA-p annaassiniartartuisa Islandimiikkunnaarnerisa kingunerisaanik nunap immikkoortuani annaassiniartartut ikileriaateqarput.
Taamaattumik isumannaallisaanermi annaassiniartarnermilu apeqqutit pillugit suleqatigiinnertik isumasioqatigiinnertillu nunat sakkortusassagaat kiisalu upalungaarsimanissap ataqatigiissaarneqarnissaa aammalu nunap immikkoortuani ajunaarnersuarnik annertuunik pisoqartillugu suliniuteqartarnerup naleqqussarneqarnissaa siunertaralugit annaassiniartarnermi ataatsimut sungiusaqatigiittoqarnissaa Siunnersuisoqatigiinnit kaammattuutigineqarpoq.
Tamanna tunngavigalugu pingaartumik nunap immikkoortuani annassiniartartoqatigiit akornanni suleqatigiinnerup annertusarneratigut, nunat ataatsimut soqutigisallit suliniuteqarnerisa ataqatigiissaarnerulerneratigut periarfissat iluaqutissartaat ilanngullugit ataatsimeersuarnermi oqallisigineqassapput. Nunat nunanik allanik niueqateqarnissamik isumaqatigiissutaat assigiinngitsut, tassunga ilanngullugit ajunaarnersuaqartoqarsinnaanerani qisuariaatissat ataqatigiinnerusumik ataqatigiissaarneqarnissaannut periarfissat kiisalu nunap immikkoortuani naalagaaffiit amerlasuut ajunaarnersuaqartoqarsinnaanerani inuttut avatangiisillu eqqarsaatigalugit qisuariaatissaat annertunerusumik ataqatigiissaarneqarnissaat oqallisigineqassapput. Aammattaaq suleqatigiinnerup annertusarneqarneratigut nunat suliniuteqarsinnaassusaasa pitsaanerusumik atorluarneqarsinnaanerat, tamatumalu peqatigisaanik nunap immikkoortuani ajunaarnersuaqartoqarnerani piaartumik qisuariaateqarsinnaanermut periarfissaannik pitsanngorsaanissaq isumaliutigineqarpoq.
Annaassiniarnermi ataatsimut sungiusaqatigiinneq siullerpaaq
Nunat Avannarliit Killiit Siunnersuisoqatigiivisa aalajangersimasumik qulequtaqarlutik ataatsimeersuarnerannut atatillugu MRCC-Tórshavn, Savalimmiuni upalungaarsimanissamut oqartussaasut, Færøernes Kommando, Islands Kystvagt kiisalu Savalimmiuni Islandimilu namminneq kajumissusertik atorlugu annaassiniartartoqatigiit ataatsimut sungiusaqatigiinnissaat aaqqissuunneqassaaq ingerlanneqarlunilu. Nunami imaatigullu annaassiniarnermik sungiusartoqassaaq. Pineqartut taakku tamarmik ataatsimut aatsaavissuaq sungiusaqatigiittussaammata pisussaq oqaluttuarisaanikkut pingaaruteqarpoq.
Allanut tunngatillugu
Ataatsimeersuarnissamut pilersaarutaagallartoq ilanngunneqarpoq.
Nunat Avannarliit Killiit Siunnersuisoqatigiiffiat Kalaallit Nunaanni Inatsisartut, Savalimmiuni Lagtingip aammalu Islandimi Altingip akornanni pisortatigoortumik suleqatigiiffiuvoq. Siunnersuisoqatigiit Siulittaasoqarfianniipput siulittaasoq Karl V. Matthíasson, Islandip Altingiani ilaasortaq, siulittaasullu tullii Kári P. Højgaard, Savalimmiut Lagtingianni ilaasortaq aammalu Ruth Heilmann, Kalaallit Nunaanni Inatsisartut siulittaasuat.
Aalajangersimasumik qulequtaqarluni ataatsimeersuarnissaq pillugu annertunerusumik paasisaqarusukkuit: Siunnersuisoqatigiit allattaat Thordur Thorarinsson, tlf. 00354 563 0731, vestnordisk@althingi.is
Ataatsimut sungiusaqatigiinnissaq pillugu annertunerusumik paasisaqarusukkuit: Upalungaarsimanermut ataqatigiissaarisoq Rógvi Finnsson Johansen, Savalimmiuni upalungaarsimanissamut oqartussaasut, 00298 236616, rogvi@mrcc.fo