Nutaarsiassat

27-08-2008

Nunat Avannarliit Killiit ukiumoortumik ataatsimiinnerannit oqaaseqaat nr. 1/2008 Nunat Avannarliit Killiit Siunnersuisoqatigiivisa puisinniarneq arfanniarnerlu taperserpaat

Ilisimatuussutsikkut ilisimatusarnermik angusanillu tunngavilimmik arfanniarneq puisinniarnerlu pillugit aalajangiinerit kiisalu uumasoqatigiit nungutaanissamik ulorianartorsiortinneqarnerat pineqanngippat niuerutaasumik ilisimatuussutsikkulluunniit piniarnerit pineqaraluarpata Nunat Avannarliit Killiit nungusaataanngitsumik piniarneq tapersersorpaat.  Taamaammat Savalimmiut, Kalaallit Nunaata, Japanip, Islandip, Norgip Russit Nunaata USA-llu, allallu, arfanniarneri Nunat Avannarliit Killiit Siunnersuisoqatigiivisa tapersersorpaat. Siunnersuisoqatigiit erseqqissarumavaat pinngortitami isumalluutinik nungusaataanngitsumik tunngavik aallaavigalugu nunat taakku arfanniarnissamik aalajangertartut, nunanilu kulturikkut kingornussat nunanilu tamalaani inatsisit tamatumunnga ilaasut. Aalajangerneq ilisimatusarnermik, periusiusunik allatullu ilisimatuussutsikkut uppernarsaatinik tunngaveqartuartillugu pinngortitami isumalluutiminnik nungusaataanngitsumik atuinissaat  inuiaat namminersortut piginnaatitaaffigiinnarnagu aammattaaq pisussaaffigigaat Siunnersuisoqatigiit tamatumunnga ilanngullugu erseqqissaatigaat.

Nunat Nunani Avannarlerni Killerniittut puisinniarlutillu arfanniarneq nunap uumassusilinnik isumalluutaasa nungusaataanngitsumik atorluarneqarnissaannik naalakkersuisuusut anguniagaqarnerannik tunngaveqarpoq, taamaalillunilu puiseqassutsimut arfeqassutsimulluunniit ulorianartorsiortitsisuunani. Tamatuma peqatigisaanik puisinniarneq arfanniarnerlu pillugit nunat avannarliit killiit naalakkersuisuisa ataatsimoorlutik paasissutissiinermik suliniuteqarnissaat Nunat Avannarliit Killiit Siunnersuisoqatigiivisa pingaartippaat, taamaaliornikkummi nunat puisinniarnermik arfanniarnermillu qangaaniit ileqqoqanngitsut misigissutsit paasisitsiniaanermillu tunngaveqanngitsumik oqallinnermik ingerlatsisarnerat, nunanilu avannarlerni killerni inuussutissarsiutinik allanik sunniisarnerat illua tungilerneqartariaqarmat.