2024 2023 2022 Flere år...
05-12-2008
Inatsisartut 2008-mi ukiakkut ataatsimiinnerat naammassivoq.
Inatsisartut 2008-mi ukiakkut ataatsimiinneranni ullormut oqaluuserisassani immikkoortut 140-t sinnerlugit oqaluuserineqarput, taakkulu ima agguataagaallutik: inatsisissatut peqqussutissatullu siunnersuutit 22-t, aalajangiiffigisassatut siunnersuutit 70-t aappassaaneerneqarnerat, aalajangiiffigisassatut siunnersuutit 33-t siullermeerneqarnerat, nassuiaatit arfineq marluk aammalu apeqquteqaat aallaavigalugu oqallinnerit sisamat kiisalu apeqqutit arfinillit.
Suliat pingaaruteqartut Inatsisartunit akuersissutigineqartut oqaluuserineqartullu ilaat tassaapput 2009-mi aningaasanut inatsisissatut siunnersuut, kommunit aqunneqarnerat pillugu Inatsisartut inatsisaat, meeqqanut suli atualinngitsut pillugit inatsisartut peqqussutaat, efterskolit pillugit inatsisartut inatsisaat kiisalu Kalaallit Nunaanni namminersorneq pillugu inatsisissatut siunnersuummik akuersissutiginninnissaq danskit naalakkersuisui Namminersornerullutik Oqartussanit kaammattorneqarnissaat pillugu Inatsisartut aalajangiiffigisassaattut siunnersuut.
Kiisalu Inatsisartut Suleriaatsiminnut allannguut akuersissutigaat.
Nalunaarusiat pingaarutillit oqaluuserineqarput, taakku ilaat tassaallutik assigiimmik akeqartitsinerup atorunnaarsinneqarnerata kingunerisai pillugit nalilersuineq pillugu nassuiaat, eqqagassat pillugit iliuusissatut pilersaarusiaq 2010 ¿ 2013 pillugu nassuiaat aammalu siusinaartumik pensionisiat pillugit nassuiaat.
Aammattaaq inatsisartunut ilaasortat aalajangiiffigisassatut siunnersuutaat 70-it missaanniittut aalajangiiffigineqarput.
Inatsisartut 2008-mi ukiakkut ataatsimiinneranni ullormut oqaluuserisassat allannguuteqangaatsiartarsimapput. Ullormut oqaluuserisassat allannguutaat taakku Naalakkersuisunit, ataatsimiititalianit ilaasortanilluunniit saqqummiunneqarsimapput aammalu Siulittaasoqarfimmit oqaluuserineqareerlutik Inatsisartunit akuerineqarsimallutik.
UKA 2008-mi ullormut oqaluuserisassat Inatsisartunut ilaasortanut ulloq 28. august nassiunneqarput aammalu ullormut oqaluuserisassanut atatillugu kingusinnerpaamik UKA 2008-p aallartinnissaa sapaatip akunneranik sioqqullugu oqaaseqarnissamut kissaateqarnissamullu ilaasortat Siulittaasoqarfimmit periarfissinneqarput.
Paasissutissat annertunerusut uani atuarneqarsinnaapput
Paasissutissat annertunerusut uunga saaffiginninnikkut pissarsiarineqarsinnaapput:
Inatsisartut Siulittaasuat Ruth Heilmann, mobil 52 08 05