2024 2023 2022 Flere år...
20-08-2008
Annaassiniartarneq, EU, killeqanngitsumik niueqatigiinneq kiisalu arfanniarneq puisinniarnerlu nunat avannarliit killiit oqaluuseraat
EU-mut attaveqarneq ataatsimiinnermi oqallisigineqassaaq, minnerunngitsumik nunani avannarlerni killerni pingaarnersiuilluni tulleriiaakkat pillugit EU-mut paasissutissiinissamut nunap immikkoortuata periarfissai annertusarniarlugit ukiut tamaasa ilisimatitsiffiusumik ataatsimiittarnissartik Nunat Avannarliit Killiit Siunnersuisoqatigiivisa Siulittaasoqarfiata Europaparlamentillu aprilimmi aalajangiinerat eqqarsaatigalugu.
Aalisarnermut piniarnermullu atatillugu nunat avannarliit killiit EU-mut nukittunerulerniarlutik suleqatigiinnertik qanoq nukittorsarsinnaaneraat ukiumoortumik ataatsimiinnermi oqalligisineqassaaq. Aammattaaq nunami isumalluutinik uumassusilinnik tamanik, tassunga ilanngullugu puisinik arfernillu piujuartitsinissamik tunngaveqarlutik atorluaanissamut nunani avannarlerni killerni nunat pisinnaatitaaffii kiisalu nunani piniarnermik ileqqoqanngitsuni taamatut piniarneq pillugu misigissutsinik qaammarsarneqannginnermillu tunngaveqarajuttumik oqallittarnerit akiorniarlugit piujuartitsinissamik tunngaveqarluni piniarneq pillugu paasissutissanik ingerlatitseqqittarnissamut nunat ataatsimut qanoq suliniuteqarsinnaanersut oqallisineqassaaq.
2010-mit aallartittumik ukiut tamaasa augustimi Nunat Avannarliit Killiit Ulluannik pilersitsisoqarnissaa aammalu nunani avannarlerni killerni naalakkersuisut ullormik nalliussisarnissaat pillugu aalajangersakkamik Inatsisartut siulittaasuat Ruth Heilmann ataatsimiinnermi saqqummiussissaaq.
Nunat atlantikup avannaamiut annaassiniarnissamut suleqatigiinnerat aammalu ajunaarnersuaqarnerani qisuariaatissanik ataqatigiissaarinerat ataatsimiinnermi oqaluuserisassani salliutinneqarluinnarput. Siunnersuisoqatigiit junimi qulequtaqarlutik ataatsimeersuarnerannit inerniliinerit tunuliaqutaralugit nunani avannarlerni killerni nunat Nunani Avannerlerni Norgimilu nammineq piumassuseq tunngavigalugu upalungaarsimanissaat pillugu kiisalu sumiiffinni assigiinngitsuni, tassunga ilanngullugu Kalaallit Nunaanni nammineq piumassuseq tunngavigalugu upalungaarsimasoqarnissaanut qanoq pisariaqartitsisoqarneranik misissueqqissaarisussamik ataatsimiititaliornissamut Kalaallit Nunaanni Attaveqarnermut Naalakkersuisoqarfiup NORA-llu suleqatigiinnissaat pillugu aalajangersimasumik siunnersuuteqartoqassaaq.
Nunat akornanni killeqanngitsumik niueqatigiinnissamik isumaqatigiissut, Hoyviksaftalemik taaneqartartoq, pillugu Savalimmiut Islandillu misilittagaat nassuiaatigineqassapput aammalu Kalaallit Nunaata tassani peqataasinnaanissaa oqallisigineqassalluni.
Nunat Avannarliit Killiit Siunnersuisoqatigiivisa aalajangersagaasa Nunat Avannarliit Siunnersuisoqatigiivini oqaluuserineqarsinnaanissaat Nunat Avannarliit Killiit Siunnersuisoqatigiivisa Nunat Avannarliit Siunnersuisoqatigiivinik suleqatigiinnissamik isumaqatigiissutaatigut ammaanneqassaaq. Atlatikup avannaani umiarsuit angallannerannut inatsisinik maleruagassanillu misissuisussamik, taakkunani amigaatinik misissueqqissaarisussamik sumiiffimmilu angallannerup isumannaatsuunissaanut pitsanngorsaataasussanik siunnersuutinik saqqummiussisussamik nunani avannarlerni ataatsimiititaliortoqassasoq ukiumoortumik ataatsimiinnermi Nunat Avannarliit Siunnersuisoqatigiivinut qinnuteqaateqartoqarpoq. Annaassiniarnermi isumannaallisaanermilu apeqqutit pillugit atlantikup avannaata eqqaani nunat akornanni suleqatigiinnermut takussutissiaq tunngavigineqassasoq aammalu imaani angalasut isumannaatsuunissaat pillugu nunat tamalaat imarsiornermut ataatsimiititaliarsuannut ataatsimut siunnersuusiornissamut tunngavigineqassasoq siunnersuutigineqarpoq. Aammattaaq imaani ajunaarnersuaqassagaluarpat qanoq suliniuteqartoqarnissaanut qanorlu suleqatigiittoqarnissaanut iliuusissatut pilersaarusiortoqassasoq siunnersuutigineqarpoq.
Ilinniartitaaneq, minnerunngitsumik nunani sulisussanut ilinniarsimanngitsunut ilinniartitaanikkut qanoq neqerooruteqartoqarnersoq, ukiumoortumik ataatsimiinnermi annertuumik aamma soqutigineqarpoq.
Nunat Avannarliit Killiit Siunnersuisoqatigiiffiat Savalimmiuni Lagtingip, Kalaallit Nunaanni Inatsisartut Islandimilu Altingip akornanni suleqatigiiffiuvoq.
Paasissutissanik allanik pissarsiniaraanni: Thordur Thorarinsson, siunnersuisoqatigiit allattaat, +354 5630731, vestnordisk@althingi.is