2024 2023 2022 Flere år...
20-11-2008
Nunat avannaani issittumiittut ataatsimiinneranni Tuluit Nunaat isornartorsiorneqarpoq
Kári oqaluttuarpoq, nunat tamakkerlutik namminneq pinngortitamit pisuussutiminnik illersorneqarsinnaasumik nungusaataanngitsumik atuinissamut pisinnaatitaanerat Nunat Avannarliit Killiit Siunnersuisoqatigiiffiannit assut pingaartinneqartoq taamaammallu nunat tamarmik illersorneqarsinnaasumik nungusaataanngitsumik arfernik puisinillu piniartarnerat siunnersuisoqatigiinnit tamakkiisumik tapersersorneqartoq. Nunat amerlasuut, assersuutigalugu Rusland-i, USA-p Kalaallit Nunaatalu puisinniartarneq arfanniartarnerlu kulturikkut kingornussaasa ilagigaat tikkuarpaa, taamatullu arferit puisillu illersorneqarsinnaasumik nungusaataanngitsumik atorneqartarnissaat nunat aalisarnermik ingerlataqartut aningaasaqarnerannut kiisalu imaata uumassusilinnik pisuussutaanik illersorneqarsinnaasumik nungusaataanngitsumik atorneqartarnissaat pingaaruteqartoq. Tamatuma peqatigisaanik Kári-p isornartorsiorpaa, puisit amiinik tuniniaasarnerup inerteqqutigineqarnissaanik siunnersuutit EU-mi oqaluuserineqarsimanerat. Tikkuarpaalu Kalaallit Nunaata annertuumik isertitsissutigisartagaasa ilaannut tamanna annertuumik sunniuteqassasoq.
Nunat Avannarliit Killiit Siunnersuisoqatigiiffianni ilinniartitaanerup pitsanngorsarneqarnissaa tamatigut pingaartillugu oqaluuserineqartartoq Kári Højgaard-ip oqaatigaa. Ataatsimiinnermi ilisimatitsissutigaa 2009-mi sammineqartussaq tassaassasoq: Nunani avannarlerni sulisorisat ilinniagaqarsimanngitsut ilinniagaqarnissamik toqqaanissaat, tamatumani nunani avannarlerni innuttaasut nalinginnaasut ilinniakkamik, ingerlaqqiffiusumik ilinniakkamik imaluunniit inuussutissarsiutigut ilinniakkamik toqqaanissamut periarfissaasa annertusaaffiginissaannut tapersiinissaq siunertaavoq.
¿Anti-terroriste, Crime og sikkerheds Act of 2001¿, aningaasaqarnikkut aningaaserivimmi suliami Island-imut Tuluit Nunaanni oqartussaasuisa atorniarmassuk Kári-p sakkortuumik oqaaseqarluni isornartorsiorpai. Tamanna akuerineqarsinnaangitsoq aammalu sumiiffimmi nunani tamat oqartussaaqataanerannik ingerlatsiffiusuni tamani ernumanartuusoq Kári-p erseqqissarpaa. Nunanik allanik akerleriissutaasinnaasut eqqartuussiviit aqqutigalugit Tuluit Nunaata ingerlassimassagaluarmagit tikkuarpaa.
Paasisutissat annertunerusut pissarsiariniarukkit, Thordur Thorarinsson, generalsekretær, oqarasuaat +354 661 1717-imut attavigisinnaavat.