2024 2023 2022 Flere år...
28-10-2008
Avannaanut Suliniummut tunngatillugu Nunat Avannarliit Siunnersuisoqatigiivisa Ataatsimeersuarneranni oqallinnermi Inatsisartunut ilaasortap Josef Motzfeldtip oqalugiaataa.
2008-mi septembarip qaammataani Ilulissani ataatsimeersuartoqarpoq, nunallu avannarliit suleqatigiinnermut ministeriinut svenskit siulittaasorititaat ataatsimeersuarnermut siulersortaalluni. EU¿mi kommissionimut ilaasortat sinniisuutitaat, ministerit, EU¿mi atorfikkaat ilisimatusartullu amerlasuut, taamatullu nunat issittumiittut innuttaallu amerlasuut ataatsimeersuarnermi peqataapput.
Nunami imaanilu uumassusilinnik isumalluutinut tunngasut, kiisalu issittup imartaani angallannermut, nukissiuutinik iluaquteqarnermut kiisalu nunani issittumiittuni ineriartortitsinermut tunngasut ataatsimeersuarnermi pingaarutilittut oqaluuserineqarput.
Taamaalillunilu issittumut ataqatigiissumik naalakkersuinikkut anguniagaqarnissamut oqaasertaliinissaq kiisalu EU¿mi kommissionimut attuumassutilinnik issittumi apeqqutinik sammisaqartutut allaffissornikkut ataatsimoorfiusup nukittorsarneqarnissaa ataatsimeersuarnermit EU-kommissionimut isumassarsiaritinneqarput.
Taamaammat Avannaanut Suliniutip issittumut tunngasortaanut atatillugu naalakkersuinikkut EU¿mut pitsaasumik oqaloqateqarnitta nanginneqarnissaa pissusissamisoortumik naatsorsuutigaarput. Aammattaaq ilanngullugu qularutiginngilara ataatsimeersuarnermi angusassavut 2009¿mi svenskit EU¿mut siulittaasuunissaannut tunngavissiiumaartut.
Avannaanut Suliniummut EU¿p naalakkersuinikkut anguniagaanut tunngatillugu naalakkersuinikkut suliniutit erseqqinnerusumik imarisaannik immikkoortukkaarluni oqallinnermi, nunat assigiinngitsorpassuit sinniisuutitaasa ilaannai taallugit, peqataasimapput EU-mi, Sverigemi, Danmarkimi, Norgemi, Finlandimi, Ruslandimi, Savalimmiuni, Estlandimi, Letlandimi, Polenimi, Kalaallit Nunaanni Islandimilu inatsisartunut ilaasortat.
Paasissutissanik annertunerusunik pissarsiumasut inatsisartunut ilaasortaq Josef Motzfeldt, oqarasuaat angallattagaq (+45) 24 42 34 06 attavigisinnaavaat.
Nunani Avannarlerni Siunnersuisoqatigiit nunanit Norgemit, Danmarkimit, Sverigemit, Finlandimit, Islandimit nunanillu namminersornerusunit, Ålandimit, Savalimmiunit Kalaallillu Nunaannit 87-nik ilaasortalittut suleqatigiiffiuvoq.
Nunani Avannarlerni Siunnersuisoqatigiinnut Inatsisartut marlunnik ilaasortaatitaqarlutillu marlunnik sinniisussaqarput. Inatsisartunut ilaasortat Augusta Salling Atassummiit, Josef Motzfeldtilu Inuit Ataqatigiinniit ilaasortaapput, taakkulu nammineerlutik sinniisussaraat inatsisartunut ilaasortaq Lars Emil Johansen, Siumumiit, inatsisartunullu ilaasortaq Ane Hansen, Inuit Ataqatigiinniit. Augusta Salling aamma Lars Emil Johansen Avatangiisinut Pinngortitamullu Ataatsimiititaliamut attuumassuteqarput, aammalu Josef Motzfeldt Ane Hansenilu Kultureqarnermut Ilinniartitaanermullu Ataatsimiititaliamut attuumassuteqarlutik.