2024 2023 2022 Flere år...
26-11-2008
Uunartimi innaallagissiorfik matuneqassaaq
Isumasioqatigiinnermi innaallagissiorfiup matuneqarnissaa pillugu Naalakkersuisut nassuiaataat Ilaqutariinnermut Ataatsimiititaliamit tusaatissatut tiguneqarpoq.
Ilaqutariinnermut Ataatsimiititaliamilli isumaqartoqarpoq Naalakkersuisut aalajangiinerisigut Nukissiorfiit matusinialernerat piffissamik eqquinerlunnerusoq. Soormi tamanna pillugu aalajangiiniaqqinnissaq 1. januar 2009-ip kinguninnguanut kommunerujussuit aalajangiisinnaassuseqalernissaasa tungaanut utaqqimaarunniarneqanngila? Kommunerujussuup Uunartimi innaallagissiorfimmik ingerlatsisinnaaneranut Ikaarsaariarnermi Ataatsimiititaliat maannakkut aalajangiinissamut periarfissaqanngillat.
Nunaqarfimmi Uunartimi innaallagissiorfeqarnermi qaammaqquteqarnikkut kiassarneqarnikkullu pissutsit Ittoqqortoormiini inuunerup qaamasumik ingerlanissaanut akuersaarnermut attuumassuteqarluinnarmata ilaatigullu nunaqarfik kulturikkut oqaluttuarissanikkullu pingaaruteqarmat, innaallagissiorfik ikumatillugu kommunerujussuarmut nutaamut tunniunneqarnissaa inuiaqatigiinnit akisussaa ssuseqarluni qulakkeertariaqartoq Ataatsimiititaliamit isumaqarfigineqarpoq.
Ilaqutariinnermut Ataatsimiititaliaq Uunartimi pissutsinik soqutiginnilluni malinnaasimavoq. Taamaaliorsima voq naak 2004-miilli nunaqarfimmi aalajangersimasumik najugaqartutut nalunaarsimasoqanngikkaluartoq. Ilaqutariinnermut Ataatsimiititaliamit innaallagissiorfik pillugu soqutiginninneq ilaqutaariinnit innuttaasunillu qanorluunniit ukioqaraluartunit Ittoqqortoormiinneersunit nunaqarfiup ornissaata kajungernartuuneranik nuannarineqarneranillu pissuteqarpoq, minnerunngitsumillu nunaqarfiup imigassamik atornerluinermut katsorsaavittut atorneqartarnera pissutaatinneqarluni. Nunaqarfik sukisaarsarfittut ornigarneqartartoq innuttaasut toqqissisimanissaannut ingerlalluarnissaannullu pingaaruteqarluinnartuusoq Ilaqutariinnermut Ataatsimiititaliamit siusinnerusukkulli oqaatigineqartareerpoq.
Annertunerusumik paasisaqarusunnermi Ilaqutariinnermut Ataatsimiititaliami ilaasortat uku attavigineqarsinnaapput:
Inatsisartunut ilaasortaq Isak Davidsen, Siulittaasoq, mobil 52 09 53
Inatsisartunut ilaasortaq Emilie Olsen, Siulittaasup tullia, mobil 52 86 64
Inatsisartunut ilaasortaq Vittus Mikaelsen, mobil 59 82 12
Inatsisartunut ilaasortaq Agathe Fontain, mobil 48 45 31
Inatsisartunut ilaasortaq Astrid Fleischer Rex, mobil 48 35 29
Inatsisartunut ilaasortaq Ane Marie Smidt Hansen, mobil 24 59 41