2024 2023 2022 Flere år...
21-11-2008
Inatsisartut ataatsimiittarfianni ¿taasisitsinermi peqquserluttuliorneq¿ pillugu ammasumik allakkamut akissut
Suliassaq saaffiginnissutillu Siulittaasoqarfiup tigusai suliamullu tunngatillugu suli tigooragai misissorneqarsinnaasut aallaqqaataaniilli Inatsisartut Siulittaasoqarfiata pimoorukkai qularutigineqassanngilaq.
Arlaatali maleruagassat ilumut unioqqutissimanerai qarasaasiakkut taasisitsinermut atortut atorlugit uppernarsassallugu teknikkikkut ajornarluinnartoq paasinarsisimavoq. Qarasaasiakkut taasisitseriaatsip kia taasisimanera nalunaartarpaa, piffissamili taasinerup nalaani kina ataatsimiittarfimmiinnersoq pinnagu. Oqallinnerimmi nalaani Inatsisartut ilaasortaat piffissaq tamakkerlugu ataatsimiittarfimmiittanngillat. Isertarlutillu aneqattaartarput: allaffimminni sulisarput, tusagassiortunik oqaloqateqartarput, oqarasuaatikkut sianerfigitinnitik akisarpaat, piareersartarput. Piffissap ilaani ataatsimiittarfimmiittarput tullianili anereersimasarlutik.
Inatsisartut ataatsimiittarfianni assiliissutit ikkussorneqaqqammersut assilisaat aamma uppernarsaatitut atorneqarsinnaanngillat. Assiliissutimmi taakku ilaasortat issiaviinut sammisuunatik mikrofonilu ikumanersoq apeqqutaatillugu oqaluttarfimmut ataatsimiinnermilluunniit aqutsisumut sammisuummata.
Alla sinnerlugu taasinermikkut Inatsisartut taasisarneq pillugu maleruagassaannik unioqqutitsisimanertik nassuerutigalugu Inatsisartunut ilaasortat marluk ullumi saqqummerput.
Tamanna tunngavigalugu pissutsit nassuerutigineqartut pinerluttulerinermik inatsimmi aalajangersakkanik unioqqutitsinermik kinguneqarsimanersut inatsisilerinikkut naliliivigitinneqassoq Inatsisartut Siulittaasoqarfiata aalajangerpaa. Tamatuma kingorna Kalaallit Nunaanni Politimesteri suliamut akulerutsinnissaanik qinnuigissallugu pissutissaqarnersoq Siulittaasoqarfiup isummerfigissavaa.
Inatsisartunut ilaasortat Inatsisartut taasisarneq pillugu maleruagassaannik sakkortuumik sanioqqutsisut iliuuseqarfiginissaannut Inatsisartut Suleriaasiat periarfissiinngimmat Siulittaasoqarfiup oqaatigissavaa. Pissutsit maanna atuuttut tamanna pisariaqartoq takutippaat. Taamaattumik amigaat tamanna iluarsiiviginiarlugu Inatsisartut Suleriaasiata allanngortinneqarneranik Inatsisartut Suleriaasissaattut siunnersuutip pingajussaaneerneqarneranut allannguutissatut siunnersuummik Siulittaasoqarfik saqqummiussiniarpoq.
Taasisitsinermili ¿sianiinaarisoqarsimaneranik¿ tusatsiakkanik ingerlaartoqaqqilernissaa PINNGITSOORTISSINNAAVARPUT. Soorlu taasisitsinernut atatillugu nakkutilliinermut malitassatut periusiusunik atuutilersitsinikkut. Taamaaliorpugullu. Tamannalu erngersumik isumagaarput. Atornerluisoqarnissaa pinngitsoortinniaannarnagu, aammali Inatsisartut ilaasortaat pisuussutiginngisaminnik tatigisaajunnaaqqunagit pasillerneqaqqunagillu.
Inussiarnersumik inuulluaqqusillunga
Ruth Heilmann
Inatsisartut siulittaasuat
Inatsisartut Siulittaasoqarfiat sinnerlugu