2024 2023 2022 Flere år...
06-03-2008
Timmissat pillugit nalunaarutip allanngortinneqannginnerani Naalakkersuisunut suliakkiissutigineqartoq pillugu Inatsisartut Eqqissisimatitsinermut Avatangiisinullu Ataatsimiititaliaata tusagassiuutitigut nalunaarutaa
Timmissat illersorneqarnissaat pillugu nalunaarutip atuuttup iluarsaanneqarnissaanut qanoq tunngavissaqartiginersoq nalilersuisussanik Naalakkersuisut atituumik katitsikkamik suleqatigiissitaliornissaannut Inatsisartut 2007-mi ukiakkut ataatsimiinneranni tamakkiisumik taperserneqarpoq. Aammattaaq Naalakkersuisut suliartik sukkangaatsiartumik naammassissagaat piumasarineqarpoq.
Inatsisartut 2007-mi ukiakkut ataatsimiinneranni Atassutip Inatsisartunut ilaasortaatitaasa aalajangiiffigisassatut siunnersuutaat una Inatsisartut akuersissutigaat:
Timmissat pillugit nalunaarutip allanngortinneqarsinnaanerani tunngavissat pingaarnerit sisamaasut uku Naalakkersuisunit eqqumaffigineqarnissaat Eqqissisimatitsinermut Avatangiisinullu Ataatsimiititaliap aalajangiusimavaa:
-
Piujuartitsinermik tunngaveqartumik ingerlatsineq illoqarfinni nunalu tamakkerlugu aalajangiusimaneqassasoq.
-
Timmissat manniliorsinnaassuseqarnerisa iluatsilluarnerpaamik qulakkeerniarneqarnissaa.
-
Timmissat manniliornerminni eqqissisimatinneqarluinnarnissaat.
-
Mianersortumik periuseqarnissap atortuutinneqalissasoq.
Matumani pineqartumik Inatsisartut suliaqarnerannut atatillugu suleqatigiissitap kaammattuutai tamannalu pillugu Naalakkersuisut isumaliutigisaat pillugit ilisimatitsissummik Eqqissisimatitsinermut Avatangiisinullu Ataatsimiititaliaq tigusaqarsimanngilaq.
Annertunerusumik paasisaqarusukkuit ¿ Inatsisartut Eqqissisimatitsinermut Avatangiisinullu Ataatsimiititaliap siulittaasua attavigiuk: Emilie Olsen mobil: 52 86 64