2024 2023 2022 Flere år...
14-04-2008
Aluminiumik Suliniut pillugu Inatsisartut Ataatsimiititaliarigallagaata sulinera siumukarfiulluarpoq
Siunnersuutip saqqummiunneqartup sukumiisumik suliarinissaa ataatsimiititaliap manna tikillugu sulinermini pingaartissimavaa. Ataatsimiititaliap sulineranut atasumik ataatsimiititaliaq manna tikillugu arlaleriarluni ataatsimiissimavoq aammalu Greenland Developmentip taamatullu sulisitsisut kattuffiisa sinniisaannik sassartitaqarsimalluni. Sassartitsinerit taakku ataatsimut isigalugit ataatsimiititaliamut assut iluaqutaasimapput. Tamatuma saniatigut ataatsimiititaliaq Naalakkersuisunut arlalinnik apeqquteqarpoq.
Piginnittuunerup qanoq iluseqartinneqarnissaanik apeqqut ataatsimiititaliap manna tikillugu sulinermini immikkut soqutigisimavaa. Naluneqanngitsutut piginnittuunermut ilutsit eqqarsaatersuutigineqartut pingasuupput:
1. ¿Pisarnertut¿ iluseq, tassa aluminiumik tunisassiortoq aatsitsivimmik piginnittuulluni Namminersornerullutillu Oqartussat erngup nukinganik nukissiorfimmik aammalu kallerup inneranut aqqutinik piginnittuullutik.
2. Piginneqatigiinneq, taasa Namminersornerullutik Oqartussat aluminiumillu tunisassiortoq erngup nukinganik nukissiorfimmik, kallerup inneranut aqqutinik aatsitsivimmillu piginneqatigiillutik. Taamatut piginneqatigiinneq assersuutigalugu 50/50-iusinnaavoq.
3. Piginnaatitsissuteqarneq, tassa aluminiumik tunisassiortoq erngup nukinganit pissarsiarisinnaasanik kisermaassisinnaatitaalluni namminerlu erngup nukinganik nukissiorfimmik aatsitsivimmillu sanallunilu ingerlatsissalluni.
Piginnittuunermut iluserititassaq aalajangersimasoq kaammattuutigissallugu ataatsimiititaliap manna tikillugu aajangiutinngilaa. Taamaalillunilu piginneqatigeeriaatsip inassutigineqarnissaanik ataatsimiititaliap aalajangiussereersimaneranik KNR radiuaviisip sapaatip akunnerata naanerani saqqummiussaa eqqunngilaq. Iluserititassat tamarmik pitsaaqutitaqartutut pitsaanngequteqartutullu ataatsimiititaliamit isigineqarput, taamaattumillu sukumiisumik isumaliutiginnillunilu misissuinissaq pisariaqarpoq. Taamaalillunilu pigittuunermut iluserititassaq pillugu kaammattuutit avataaneersunit arlaannaannulluunniit attuumassuteqanngitsunit misissorneqarnissaannik ataatsimiititaliap Inatsisartunut inassuteqarnissaa ilimanaateqartutut oqaatigineqartariaqarpoq.
Tassunga atatillugu Islandimi aluminiumik suliniut pillugu qitiusumit najukkanilu aalajangiisartut aammalu innuttat soqutigisaqaqatigiillu tikillugit nammineerluni paasisaqarnissaq anguniarlugu 2008-mi junip aallartinnerani Islandimut paasisassarsiorluni angalanissaq ataatsimiititaliap ilaatigut aalajangiuppaa.
Ataatsimiititaliaq sinnerlugu
Jonathan Motzfeldt Kuupik Kleist
Siulittaasoq Siulittaasup tullia