2024 2023 2022 Flere år...
15-01-2008
Tallimanngorneq 2008-mi ulloq januaarip 18¿at nal. 15.00 Kalaallit Nu-naanni Inatsisartut immikkut ataatsimiinnissaannut aggersaaneq
Pasilliutitut saqqummiussuunneqartut eqqissiviilliornermik kingunerisaasa Inatsisartut innuttaasunit isigineqarnerannik, Kalaallillu Nunaata nunani allani isigineqarneranik partiimalu naalakkersuinikkut sulineranik isiginninnermik ajorsisitsisinnaapput. Taakku pissutigalugit Kalaallit Nunaanni Inatsisartut Siulittaasuattut allatut ajornartumik tunuartariaqarpunga.
Tamatuma nassatarissavaa Inatsisartut Siulittaasoqarfiata tamarmiusup tunuarnissaa. Taamaammat Siulittaasoqarfimmik nutaamik qinersinissaq siunertaralugu 2008-mi januaarip 18-anni Inatsisartut immikkut ittumik ataatsimiigiaqqullugit matumuuna aggersarneqarput.
Ataatsimiinnermut aggersaasoqarpoq makku oqaluuserisassaralugit:
Immikkoortoq 1. Ataatsimiinnerup ammarneqarnera ullormullu oqaluuserisassat akuersissutigineqarnerat.
Immikkoortoq 2. Inatsisartut Siulittaasuannik qinersineq.
Immikkoortoq 3. Inatsisartut siulittaasuata tulliinik qinersineq.
Immikkoortoq 4. Inatsisartut Ataatsimiititaliaannut qinersineq.
Inussiarnersumik inuulluaqqusillunga
Jonathan Motzfeldt
Inatsisartut Siulittaasuat