2024 2023 2022 Flere år...
03-02-2008
Namminersornerullutik Oqartussat aammalu Arctic Green Food A/S-ip akornanni kiffartuussinissamik isumaqatigiissut nutaaq Aningaasaqarnermut Ataatsimiititaliamit akuersissutigineqarpoq.
Ulloq 11. januar 2008-mi qinnuteqaat manna Aningaasaqarnermut Ataatsimiititaliap ulloq 11. januar 2008-mi pisarnermisut ataatsimiinnermini siullermeerlugu oqaluuseraa. Tamatumani ilassutitut paasissutissanik kiisalu kiffartuussinissamik isumaqatigiissummut missingiummik nutartikkamik pissarsiniarnissaq siunertaralugu ataatsimiititaliap isumaqatigiittup aalajangiinissani kinguartinniarlugu aalajangerpoq.
Tamatuma kingorna Naalakkersuisut akissuteqaataat ulloq 29. januar 2008-mi unnukkut Ataatsimiititaliap tiguaa.
Taamaalilluni ataatsimiititaliap suliamik suliarinninnera sapinngisamik siuarsarneqarpoq. Tassunga atatillugu ilaatigut Kangerlussuarmi piniartut Artic Greend Foodimit (AGF) tunisinissamik mattunneqartut ajornartorsiuteqarnerata qulaajarneqarnissaata qulakkeerneqarnissaa ataatsimiititaliap pingaartissimavaa.
Arctic Green Foodip tunisassiorfiinut atatillugu kiffartuussinissamik isumaqatigiissummik nutaamik atsiornissaq pillugu Aningaasaqarnermut Ataatsimiititaliap iliuutsini pillugit Naalakkersuisunut, AGF-imut tusagassiorfinnullu eqqaasitsissutigissallugit tunngavissaqarpoq. Taamaalilluni AGF-ip tunisassiorfiini tunisinerup matuneqarnera Aningaasaqarnermut Ataatsimiititaliap pisuussutigigaa oqaatigineqarpoq. Tamanna eqqunngilaq, tamannalu kinguliiniittuni atuarneqarsinnaassalluni.
Tassunga atatillugu Naalakkersuisut aningaasatigut atugassiissutaat sunniuteqarluartumik nakkutigineqarnissaannut inatsisitigut aalajangersarneqartumik ersarissumillu Aningaasaqarnermut Ataatsimiititaliaq akisussaaffeqarmat aammattaaq erseqqissaatigissallugu pingaaruteqarpoq, tamanna ilaatigut ikiumoortumik aningaasanut inatsisissatut siunnersuutip suliarineqarnera aqqutigalugu pisarluni.
Tassunga atatillugu Aningaasaqarnermut Ataatsimiititaliaq 2008-mut aningaasanut inatsisissatut siunnersuutip aappassaaneerneqarneranut isumaliutissiissummini ilaatigut ima allappoq:
(Issuaaneq aallartippoq:)
¿Kontomi matumani pineqartumi 2008-mi 19,7 mio. kr.-inik immikkoortitsinissaq siunnersuutigineqarpoq. Aningaasat taakku tunitsivinni qulingiluaasuni siuliani taaneqartuni kiffartuussinissamik isumaqatigiissut matussuserpaat. Tamatuma naligaa tunitsivimmut ataatsimut kiffartuussinissamut isumaqatigiissut aqqutigalugu ullormut 6.000 kr.-inik akiliuteqarneq.
¿ Taamaalillunilu kiffartuussinissamik isumaqatigiissutit aqqutigalugit pisortat akiliutigisartagaat AGF-ip tunitsiviini ingerlanneqartut annertussusaannut sanilliullutik annertuallaarujussuartut ersarilluinnarpoq.
Inuussutissarsiornikkut aaqqissuussinerup taamaattup imminut ersarilluinnartumik akilersinnaassuseqanngitsup piuinnartinniarneqarneranut pisortat aningaasaataannik Namminersornerullutik Oqartussat atuiinnarsinnaanngitsut ataatsimiititaliaq isumaqarpoq. Assersuutigalugu nunaqarfimmi Savissivittut ittumi takuneqarsinnaavoq kiffartuussinissamik isumaqatigiissut aqqutigalugu pisortat 1 mio. kr.-inik appasinnerunngitsunik akiliutaat atorlugit ukiup qaammataani arfinilinni siullerni 280 kr.-it nalingannik tunisisoqarsimanera, tamatuma naligaa puisip amia ataaseq suliffissallu ataatsip qulakkeernera!
Tamanna attanneqaannarsinnaanngitsutut Aningaasaqarnermut Ataatsimiititaliamit isigineqarpoq. Kiffartussinissamillu isumaqatigiissutinut akiliutaasartut ukiut missingersuusiorfiit ingerlaneranni arriitsumik annikillisikkiartuaarneqarnissaat ataatsimiititaliamit utaqqiinnarneqarsinnaanngilaq.
Taamaattumillu suliami matumani ataatsimiititaliap isummerneranik tamakkiisumik tapersiinertik ulloq 26. september aamma 8. oktober 2007-imi Naalakkersuisut nalunaarutigimmassuk assorsuaq iluarisimaaramiuk ataatsimiititaliap oqaatigissavaa. Taamaalillutillu Naalakkersuisut Aningaasaqarnermut Ataatsimiititaliatulli isumaqarput kiffartuussinissamut isumaqatigiissutinut pisortat akiliutaasa inuiaqatigiillu taakkunannga pissarsissutaasa akornanni annertunerujussuarmik ataqatigiittoqarnissaanik pilersitsinissaq pisariaqartoq.
Taamatuttaaq kiffartussinissaq pillugu AGF-imik isumaqatigiissutissami aggersumi ingerlatseqatigiiffiup nalunaaruteqartarnissaanut sullississutitullu tunniussassaanut piumasaqaatit, kiffartuussinissamut isumaqatigiissummut pisortat akiliutissaat tiguneqassappata pinngitsoornatik eqquutsinneqartussat ersarinnerujussuussasut Naalakkersuisut erseqqissarpaat.
Kiffartuussinissamik isumaqatigiissutit aqqutigalugit akiliutaasartut ilaat kommunerujussuanngortussanut ataatsimoortumik tapiissutit ilaattut tunniunneqarsinnaanerat pillugu Aningaasaqarnermut Ataatsimiititaliap siunnersuutaanut malinnikkumassuseqarnertik Naalakkersuisut oqaatigaat. Taamaalillunilu najukkami pissutsinik ilisimasaqarnertik aallaavigalugu aningaasat najukkani qanoq iluaqutaarnerusumik atorneqarsinnaanerannik kommunit naliliisinnaanerusutut isigineqarput.
Kiffartuussinissamik AFG-imut maanna isumaqatigiissut 31. december 2007-imi atorunnaassaaq. 2008-mi aningaasanut inatsisissatut siunnersuummut Naalakkersuisut allannguutissatut siunnersuutaat naapertorlugu kiffartuussinissamik isumaqatigiissummik nutarterineq Aningaasaqarnermut Ataatsimiititaliamit siumoortumik akuersissutigineqaqqaarsimassaaq.
Tamatuma kingunerisaanik kiffartuussinissamik isumaqatigiissutip annertussusissaatut manna tikillugu naatsorsuutigineqartumut sanilliullugu kiffartuussinissamik isumaqatigiissutaajumaartup aningaasartassai annikillilerneqassasut naatsorsuutigineqartariaqarpoq. Taamaattumillu kontomi matumani pineqartumi 2008-mi ukiunilu missingersuusiorfinni aningaasaliissutissatut siunnersuutigineqartut 2008-p aallartinnerani, tassalu kiffartuussinissaq pillugu AGF-imik isumaqatigiissut nutaaq atuutsinneqalerpat ikilisinneqarnissaat naatsorsuutigineqartariaqapoq.¿
(Ataatigut titarniliisoqarpoq, issuaaneq naavoq)
Ataatsimiititaliap isumaliutissiissutaa aningaasanut inatsisissatut siunnersuutip aappassaaneerneqarnerani Inatsisartuni sammivinnit tamanit paatsuugassaanngitsumik tapersersorneqarpoq.
Suliami matumani aalajangiinissap ullormut 11. januar 2008-mut ataatsimiititaliap kinguartitsinera siuliani issuakkanut tunngatillugu isigineqassaaq. Aammattaaq 2008-mut aningaasanut inatsisissatut siunnersuutip aappassaaneerneqarneranut allannguutissatut siunnersuutip nr. 118-ip Inatsisartunit akuersissutigineqarneranut atatillugu suliaq isigineqassaaq, tamatumani tunngavigineqarpoq AGF-imik kiffartuussinissamik isumaqatigiissut nutaaq Aningaasaqarnermut Ataatsimiititaliap nutaatut siumut akuersissutigeqqaartassammagu.
Taamaalilluni AGF-imik kiffartuussinissamik isumaqatigiissutip nutaap akuersissutigineqarnissaanut Ataatsimiititaliaq arlalinnik piumasaqaateqarsimammat Ataatsimiititaliaq avoqqaarineqarsinnaanngilaq. Akerlianik AGF-imik kiffartuussinissamik maannamut isumaqatigiissut eqqarsaatigalugu kiffartuussinissamik isumaqatigiissummi nutaami atugassarititaasut nutaat annertuumik sukaterneqassasut kiisalu kiffartuussinissamik isumaqatigiissummut aningaasat pilersaarutigineqaraluartumit suli annikillisinneqassasut paasillugu naatsorsuutigalugulu Inatsisartut 2008-mut aningaasanut inatsit akerlerisassaanngitsumik akuersissutigaat.
Aammattaaq AGF-imik kiffartuussinissamik isumaqatigiissut nutaaq pillugu suliamik kinguarsaasutut pisarillersaasutullu Ataatsimiititaliaq pasillissallugu isumassaqanngilaq. 2007-imi novemberip naaneraniilli ataatsimiititaliap suliamut atatillugu isumaa siuliani taaneqartoq Inatsisartullu paasinninnerat Naalakkersuisut allattoqarfiatalu ilisimavaat, tamatumunngalu naleqqussarnissartik periarfissarisimallugu.
Akerlianik suliami matumani pineqarpoq pisortat aningaasaliissutaasa sunniuteqarluartumik, isumasuartumik siumullu isiginnittumik atorneqarnissaasa qulakkeerneqarnissaa pillugu Aningaasaqarnermut Ataatsimiititaliap akisussaassuseqartup Inatsisartut sinnerlugit suliaq aaqqiiviginiarsimammagu.
Ajoraluartumik oqaatigineqartariaqarpoq tamanna suliassaavoq Inatsisartut Aningaasaqarnermullu Ataatsimiititaliap annertusiartuinnartumik namminneq kisimik suliarisariaqagaat
Aningaasaqarnermut Ataatsimiititaliaq sinnerlugu
Augusta Salling
Aningaasaqarnermut Ataatsimiititaliami siulittaasoq