2024 2023 2022 Flere år...
15-01-2008
Tusagassiuutitigut nalunaarut
Ulluni kingullerni sulisorisamik atoqateqarnikkut innarliisimasutut pasilligaaninnik tusagassiorfiit annertuumik samminnipput.
Pasilliutitut saqqummiussuunneqartut eqqissiviilliornermik kingunerisaasa Inatsisartut innuttaasunit isigineqarnerannik, Kalaallillu Nunaata nunani allani isigineqarneranik partiimalu naalakkersuinikkut sulineranik isiginninnermik ajorsisitsisinnaapput. Taakku pissutigalugit Kalaallit Nunaanni Inatsisartut Siulittaasuattut allatut ajornartumik tunuartariaqarpunga.
Tamatuma nassatarissavaa Inatsisartut Siulittaasoqarfiata tamarmiusup tunuarnissaa. Taamaammat Siulittaasoqarfimmik nutaamik qinersinissaq siunertaralugu 2008-mi januaarip 18. -anni Inatsisartut immikkut ittumik ataatsimiigiaqqullugit ullumi aggersarpakka.
Nalunngeqatiginnissutsikkut peqqissimissutissaqannginnera, sulisorisamillu pineqartumik qanorluunniit ittumik ajoquusiisimanginnera erseqqissassallugu uannut pingaartuuvoq. Pasilliutinik saqqummiussivigineqarsimanera inatsisitigut periarfissakka atorlugit pisuussuteqannginnera illersorniarpara.
Jonathan Motzfeldt