2024 2023 2022 Flere år...
16-01-2008
Tusagassiorfitsigut nalunaarut
SIK, AK aammalu DJØF-ip Fællesklubia 2008-mi ulloq januarip 15-at Inatsisartut Allattoqarfiata pisortaanut sakkortuumik ataatsimoorlutik isornartorsiutertik nassiuppaat. Tassunga atasumik siullermik aalajangersimasumik oqaatigineqassaaq Inatsisartut Allattoqarfiata suliffittut, allattoqarfimmi sulisorisat qullersaasalu inatsisinik unioqqutitsisuusumik innarliinerit qanorluunniit ittut allatullu innarliinerit sulinermi timikkut tarnikkulluunniit sunniisinnaasut isumaqatiginngimmatigit.
Kattuffiit qulaani taaneqartut tusagassiorfitsigut nalunaarutigisama isumaanik paasinninnerannut tunngatillugu oqaatigineqassaaq tusagassiorfitsigut nalunaarutigineqartup imarisaata oqaasertaanik kattuffiit isumaqartitsinerat paasinninnermik siamasinnerujussuarmik tunngaveqarmat.
"Misigisanik eqqaamasalersaarnermik" oqarneq atorneqarmat pineqartoq tassa 2007-mi juulip qaammataani allattoqarfiup qullersarisaanut saaffiginninnermi pisimasut aallaavigalugit nassuiaateqarneq. Nassuiaateqarneq politiinut unnerluutiginninnermi tusagassiorfitsigut nalunaaruteqarnerup nalaani imarisaanut ilisimaneqanngitsunut tunngassuteqanngilaq.
Tusagassiorfitsigut nalunaarutip ingerlaqqinnerani "mamarliiniartoqartoqarneranik" oqartoqarmat pisimasinnaasunik ilimaginninnernik, inatsisinik unioqqutitsilluni innarliinerup tassungalu atasumik unnerluutiginninnerup pinerinut piffissat assigiinngeqisut pineqarput. Politiinut unnerluussinerup imarisaa ilisimaneqanngilaq, oqaasertaasalu sulisorisamut pasilliinermik imaqarani.
Tusagassiorfitsigut nalunaarummi oqaatigisat taakku marluk sanileriisikkaanni paatsuungatitsisinnaammata akueraara. Taamaammat tusagassiorfitsigut nalunaarummi oqaatsinik atuineq ajuusaarutigaara.
Nicolaj Sørensen
Inatsisartut Allattoqarfiani pisortaq