2024 2023 2022 Flere år...
31-01-2008
Ulluni 29. - 30. januar 2008-mi Nunat Avannarliit Siunnersuisoqatigiivisa Stockholmimi ataatsimiinnerini Inatsisartut peqataatitaqarput
Inatsisartunut ilaasortaq Augusta Salling Nunat Avannarliit Siunnersuisoqatigiiffianni Miljø - og Naturressourceudvalgimi ilaasortaavoq aammalu Inatsisartunut Ilaasortaq Josef Motzfeldt Nunat Avannarliit Siunnersuisoqatigiiffianni Kultur- og Uddannelsesudvalgimi sinniisuulluni.
Partiit politikiat pillugu ataatsimiinnerni ataatsimiititalianilu ataatsimiinnerni peqataanerup saniatigut ulloq 29. januar 2008-mi svenskit siulittaasoqarfianni 2008-mi pisussanut pilersaarutip saqqummiunneqarnera Augusta Sallingip aammalu Josef Motzfeldtip peqataaffigaat. Pisussanut pilersaarut "Kraftssamling"-imik qulequtaqartinneqarpoq, tassanilu unammillersinnaassutsip, silap pissusilersornerata, nutaaliorsinnaanerup ataqatigiissaarinerullu aallunnerisigut Nunat avannarliit nukiit katersuuffiattut ersersinniarneqarput. Aammattaaq 2008-mi pisussanut pilersaarutip ataani ingerlatassarpassuit uani takukkit www.norden.org.
Europamiut nunallu avannarliit aalisarnermi politikikkut suleqatigiinnerat pillugu amerlanngitsunik peqataaatitaqarluni isumasioqatigiinnermik pissanganartumik soqutiginartumillu Miljø- og Naturressourceudvalget ulloq 30. januar 2008-mi ingerlataqarpoq. Nunani avannarlerni EU-milu Kalaallit Nunaat assigalugu aalisarnerup iluani piujuartitsinissaq tunngavigalugu atorluaanissaq sulissutigineqarpoq. Tamatumani pineqarlutik inuussutissarsiummik ingerlataqarneq, aningaasaliisarnerit, suliffissaqartitsiniarneq aammalu aalisagartassanik aqutsineq.
Aammattaaq nunat tamalaat issittumut ukiorititaat 2007-2008 pillugu ulloq 30. januar 2008-mi isumasioqatigiinnermi pineqartut marluk peqataapput.
Nunat Avannarliit SIunnersuisoqatigiiffiat inatsisartutigoortumik suleqatigiiffiuvoq Norgimit, Danmarkimit, Sverigemit, Finlandimit, Islandimit sumiiffinnilu namminersortunit - Ålandimit, Savalimmiunit Kalaallit Nunaanniillu 87-nik ilaasortalik.
Inatsisartut Nunat Avannarliit SIunnersuisoqatigiiffianni marlunnik ilaasortaatitaqarput marlunnillu sinniisussaqarlutik. Inatsisartunut ilaasortat Augusta Salling Atassummeersoq aammalu Per Berthelsen Demokraatineersoq ilaasortaapput, taakkulu sinniisussaraat inatsisartunut ilaasortaq Lars Emil Johansen Siumumeersoq aammalu inatsisartunut ilaasortaq Josef Motzfeldt Inuit Ataqatigiinneersoq. Augusta Salling aamma Lars Emil Johansen Miljø- og Naturressourceudvalgimi ilaasortaapput. Per Berthelsen aamma Josef Motzfeldt Kultur- og Uddannelsesudvalgimi ilaasortaapput.
Paasissutissanik sukumiinerusunik pissarsiniaraanni - attaveqarfigineqassapput
Inatsisartunut ilaasortat Augusta Salling, mobil (00299) 55 03 10 aammalu
Tuusi Motzfeldt, tlf. (0045) 24 42 34 06.