2024 2023 2022 Flere år...
16-01-2009
Inatsisartunut siulittaasuusimasumut Knud Sørensenimut eqqaaniut. Allattoq: Inatsisartunut siulittaasoq Ruth Heilmann
Knud Sørensen Aasiaat kommunianni inunngorpoq, Aasiat kommunianilu niuertorusiullunilu niuertarfimmi pisortaanikuulluni. Knud Sørensen atorfimmi saniatigut nunagisamini naalakkersuinikkut ingerlatsivoq, 1962-imiit 2005-imut kommunalbestyrelsimi ilaasortaalluni.
Knud Sørensen arlaleriarluni Aasiani borgmesteriuvoq. Siullermik 1975-imiit 1983-imut, aamma 1983-imiit 1989-imut borgmesterimut tullersortaalluni, kiisalu 1989-imiit 1995-imut aamma 2001-imiit 2005-imut borgmesterioqqulluni.
Taamatuttaaq Knud Sørensen Inatsisartunut ilaasortaanermini tatigineqarluni sinniisuuffeqarpoq, taaneqarsinnaasullu ilagai 1986-imiit 1991-imut KNI pillugu Siunnersuisoqatigiinni siulittaasutut, 1992-imiit 1995-imut kommunit pillugit aaqqissuusseqqinnermut ataatsimiititaliami ilaasortatut kiisalu Inatsisartut ataatsimiititaliaanni arlalissuarni ilaasortatut.
Kunuuteeraq inuttut nuannaartuusutut pissutsinullu neriulluartutut ilisarisimavarput, naalakkersuinikkullu ineriartornermi sunniuteqaqataasimasutut, pingaartumillu Aasiaat Kommuniani ukiorpassuarni borgmesteriusimasutut eqqaamaniassavarput, kiisalu qiimajuarnera ilaatigut napparsimalernermini Dronning Ingridip Napparsimmavissuaniilluni misigitittagaa eqqaaniarparput.
1997-imi Ridderkorset af Dannebrogsordenen Knud Sørensenimut tunniunneqarpoq, 1993-mi Nersornaat sølviusoq aamma 1996-imi Nersornaat guultiusoq Namminersornerullutik Oqartussanit tunniunneqarluni.
Inatsisartunut siulittaasuusimasoq Knud Sørensen sulinermini innuttaaqataasutut tunniusimalluartutut kiffartuussiuarsimavoq naalakkersuinikkullu suliaqarnermini ersarissumik suleqataasimalluni.
Kalaallit Nunaanni Inatsisartoqatikka sinnerlugit qimataanut qamannga pisumik misiginneqataanera ilutigalugulu Knud Sørensenimut Nunatsinnullu sullissineranut nersorinninnerput ataqqinninnerpullu nalunaarutigerusuppara. Eqqaaneqarnera ataqqinartitaali.