2024 2023 2022 Flere år...
13-02-2009
Ilinniartitaaneq aamma ilageeqarneq pillugit paasisassarsiorneq
Paasisassarsiorluni angalanermi paasisaqarfiulluartumi isumassarsiorfiulluartumilu Ataatsimiititaliaq pissarsiaqaqaaq. Inatsisartut 2009-mi upernaakkut ataatsimiinnisa nalaani kalaallit susassaqarfii assingusut naapissinnaassallugit Ataatsimiititaliap neriuutigaa. Minnerunngitsumillu Danmarkimi Islandimilu Ataatsimiititaliaq susassaqarfinnik pingaarutilinnik attaveqaateqalerpoq.
2009-mi upernaakkut ataatsimiinnermi ilageeqarneq pillugu peqqussummut nutaamut Inatsisartut isummernissaat naatsorsuutigineqarpoq. Taamaattumik Den Danske Præsteforening (Danskit Palasit Peqatigiiffiat), islandimiut biskorpiat Karl Sigurbjörnsson aamma Danmarkimi palasi kalaaleq Jens Kristian Kleist naapisimaaqatigineqarput. Ataatsimiititaliaq isumaqavippoq ilagiit inuiaqatigiinni pingaaruteqartuusut, aamma ilagiit kalaallit anersaakkut tunniusimalluartut Kalaallit Nunaannut pingaaruteqartuusut.
Islandimi oqaluffeqarfik Kalaallit Nunaannisulli innuttaasunut pingaaruteqaqaaq. Ileqqorissaarnermik nakkutilliisuunngilaq, kisiannili inuit katersuuffigalugulu naapeqatigiiffigisarpaat. Biskorpip Karl Sigurbjörnsson-ip oqaluttuaraa Islandimi oqaluffeqarfimmi ilagiit peqataalersinniarlugut oqaluffillu ullumikkumut naleqqussarniarlugu allannguineq ingerlanneqartoq. Allannguinernut qisuariaatit pitsaasuupput, minnerunngitsumillu ilagiit oqaluffimmik eqeersimaarfiusumik misigisaqartarput.
Ataatsimiititaliap isumaqatigiittup kalaallit ilagiivisa taamatuttaaq atugaqarnissaat kissaatigaa, taamaattumillu ilagiit pillugit peqqussutissap nutaap Inatsisartuni suliarineqannginnerani suliaqartuusut ilagiillu isumasioqatigineqarnissaat Naalakkersuisunut kaammattuutigalugu. Kiisalu biskorpip Karl Sigurbjörnsson-ip peqataanissamut qaaqquneqarnissaa Ataatsimiititaliamit siunnersuutiginiarneqarpoq.
Ilinniartitaanermi ilisimatusarnerup annertunerusumik ilaatinneqarnissaa aamma ilinniartitsisut ilinniartitaaqittarnerat pillugu kiisalu nunani pineqartuni ilinniartitseriaatsit ataatsimut isigalugit paasisaqarneruffigiumallugit Ataatsimiititaliaq Capital College Universitet-imit (siusinnerusukkut Center for VoksenUdannelser), Danmarks Pædagogiske Universitetsskole-mit, Islands Pædagogiske Universitetsskole-mit, modulintegrerede gymnasium-imit aamma tunngaviusumik atuarfimmit sinniisunik naapitaqarput.
Ungasissumit ilinniartitsinerup Danmarkimi siaruaassimanera ingerlalluarneralu pillugit Ataatsimiititaliamit paasisaqarfigalugu immikkut pissanganaateqarpoq. Ingammik Islandimi ungasissumit ilinniartitsineq atugaalluinnarpoq, soorlu Islands Pædagogiske Universitetsskole-imi ilinniartut 64 %-erujussui ungasissumit ilinniartitsineq atorlugu ilinniarneq tamaat ilaaluunniit ingerlattaramikku. Taamaalilluni Ataatsimiititaliaq isumaqarpoq Islandi taamaaliornermigut Kalaallit Nunaannut maligassiuilluartoq.
Paasisaqarnerorusunnermi Ataatsimiititaliap siulittaasua Kristian Jeremiassen (+299) 54 06 94 imaluunniit siulittaasuata tullia Ole Thorleifsen (+299) 48 21 82 attavigineqarsinnaapput.
Ilanngussaq:
Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaat:
Siulittaasoq Kristian Jeremiassen (Atassut),
Siulittaasup tullia Ole Thorleifsen (Siumut),
Aleqa Hammond (Siumut),
Juliane Henningsen (Inuit Ataqatigiit) og
Olga P. Berthelsen (Inuit Ataqatigiit).
Danmarkimi ukunani sinniisut Ataatsimiititaliamit ataatsimeeqatigineqarput:
Capital College Universitet (siusinnerusukkut Center for VoksenUdannelser),
Danmarks Pædagogiske Universtitetsskole, aamma Danmarks Pædagogiske Bibliotek,
Avalak (Danmakimi Kalaallit Ilinniagaqartut Kattuffiat),
Jens-Kristian Kleist, Danmarkimi palasi kalaaleq,
Den Danske Præsteforening aamma
Det Danske Filminstititut.
Islandimi ukunani sinniisut Ataatsimiititaliamit ataatsimeeqatigineqarput:
Islands Pædagogiske Universtitetsskole
Fjölbrautaskólinn við Ármúla, modulintegreret gymnasium aamma
Hvassaleitisskóli, meeqqat atuarfiat.
Kiisalu Isalandimi biskorpi Karl Sigurbjörnsson taassumalu suleqatai.