2024 2023 2022 Flere år...
16-01-2009
Inuusuttut Inatsisartui ulluni 14. - 19. februar ingerlanneqassapput.
Taamaattumik ilissinnut inuusuttunut taamatut misigisaqarnissamut Inatsisartut pilliuteqarnissaat pingaaruteqartuuvoq, taamatummi sulinermik paasisaqarnissamut periarfissinneqarpusi, inuiaqatigiinnimmi sullissinermi uagut qanoq unammilligassaqarnersugut taamaalillusi misigisaqarfigisinnaavarsi.
Imaassinnaavoq ilissi arlarsi ima pileritsatigisoq allaat Inatsisartunut ilaasortatut naalakkersuinikkut sulineq sullissinerlu siunissami misilikkusulerlugu. Tamanna Inatsisartut Siulittaasoqarfiata neriuutigaa, tamannami ilaatigut pissutaalluni Inuusuttut Inatsisartuisa ingerlanneqarnissaa Inatsisartunit pingaaruteqarluinnartutut isigineqarpoq. Kalaallit Nunaata siunissaa pillugu akisussaaqataanerup nunatsinnilu tamat oqartussaaqataanerisa nukittorsartuarnissaanik ineriartortittuarnissaanillu ilinniarnissaq pingaaruteqarpoq.
Taamaattumik Inuusuttut Inatsisartuini peqataanissamut Inatsisartullu qanoq sulinerannik aammalu inuinnaat oqartussaaqataanerannik misiliinissamut periarfissatsialak inuusuttunit maanna atorluarneqassasoq kaammattuutigiinnarneqarsinnaavoq.
Ilinniarfiit 15-it inuusuttunut attaveqarfittut atuuttut aammalu Inuusuttut Inatsisartuini peqataanissamut qanoq piareersartoqarsinnaaneranik ilitsersorneqarsimasut aqqutigalugit peqataaniarluni nalunaartoqassaaq. Aammattaaq innersuussutigineqarpoq Inatsisartut nittartagaat www.inatsisartut.gl
Taamaattumik peqataanissamik nalunaarutit kingulliit marlunngornermi ulloq 20 . januar 2009 tigunissaat Inatsisartut Allattoqarfiata Inatsisartut Siulittaas oqarfiat sinnerlugu qilanaaraa.
Inuusuttut Inatsisartuisa ingerlanneqarnissaanut, soorlu angalanermut kiisalu nerisaqarnermut ineqarnermullu il.il. atatillugu suliassat tamarmik Inatsisartut Allattoqarfiannit aaqqissuunneqarlutillu akilerneqassapput. Allanik qulaajaasoqarnissaa pisariaqartinneqassapput Inatsisartut Allattoqarfiat saaffigineqarnissaminut piareersimavoq.
Inuusuttut Inatsisartoqarnissanut atatillugu aaqqissuussineq pillugu annertunerusumik paasisaqarusuttut Inatsisartut Allattoqarfianní fuldmægtigimut Bibi Mikaelsenimut mail bibi@gh.gl
imaluunniit telefon +299 34 61 39 atorlugu imaluunniit fuldmægtigimut Sakarias Amondsenimut mail saam@gh.gl imaluunniit telefon: +299 34 61 22 atorlugu saaffiginnissinnaapput.