2024 2023 2022 Flere år...
23-01-2009
Allaaserinnipallannermi eqqarsarluaqqaarnissaq puigortoorneqarsinnaasarpoq. 2009-mi Inuusuttut Inatsisartuisa ingerlanneqarnissaat pillugu AG-mi ulloq 22. januar 2009-mi allaaserisaq tamatumunnga ajoraluartumik assersuutissaalluarpoq.
Tamatuma saniatigut inuiaqatigiinni inuusuttut immikkuullarissut aalajangersimasulluunniit inuusuttut allat pilliutigalugit naalakkersuinikkut sunniuteqarnissamut Inuusuttut Inatsisartui aqqutigalugit periarfissinneqanngimmata erseqqissaatigissallugu pingaaruteqarpoq. Inuusuttut Inatsisartui Inatsisartunut qinikkanut taartaanngillat ilassutaanatilluunniit. Taamaalilluni innuttaasoq kinaluunniit naalakkersuinikkut sunniuteqarusuttoq partiit soqutigisaqaqatigiiffiillu piusut aqqutigalugit taamatut sunniuteqarniarnissamut periarfissaqarput. Tamat oqartussaaqataanerat naalakkersuinermillu ingerlaavartumik ingerlatsineq Inuusuttut Inatsisartuinik ingerlatsinikkut allanngortinneqanngillat. Sulianik pissutsinillu uummammiorisinnaasaminnik siuarsaanissaq siunertaralugu tusagassiuutini ilanngutassiat aqqutigalugit oqaaseqarnissamut imaluunniit inunnut attaveqaataasunut, peqatigiiffinnut attaveqarfigisartakkanulluunniit saaffiginninnissamut nunatsinni innuttaasut Inuusuttut Inatsisartuinik ingerlatsinikkut mattunneqanngillat. Taamaattumik tamat oqartussaaqataanerat aallaavigalugu qinigaanikkut nalinginnaasumik peqataasinnaanermut Inuusuttut Inatsisartuisa katitigaanerat ulorianartorsiortitsinerarlugu allaaserinnittup naliliinera annertuumik ingasattajaarineruvoq.
Inatsisartut Naalakkersuisullu isumaqatigiillutik ukiut arlallit ingerlaneranni ilinniartitaanikkut suliniuteqarnerat ingasaanneqalersoq allaaserinnittoq ersersinniarsaraa. Allaaserinnittoq isummaminik immikkuullarissumik saqqummiussinissaminut soorunami pisinnaatitaavoq. Inuusuttulli Inatsisartuinik ingerlatsisarneq inuiaqatigiilerinermik ilinniartitsinermut manna tikillugu ilaatinneqartarpoq, taamaalillunilu Inuusuttut Inatsisartuisa ilinniarnermut ilaatinneqarnissaat sulissutigineqarpoq, tamatumani inuusuttut tamat oqartussaaqataanerannik inatsisartoqarneranillu sammisaqartinneqartarsimallutik. Tamanna pissutigalugu Inatsisartut Allattoqarfiat Inuusuttut Inatsisartuisa sammisassaat nikerartut aallaavigalugit ilinniartitsinermi atortussanik tunngavissanillu allaganngukkanik allanik suliarinnittarpoq. Taamaattumik tamanna tunngavigalugu Inuusuttut Inatsisartuini peqataasut tunuliaqutaasunik ilisimasaqalaarnissaat kissaatiginartillugu Inatsisartut Allattoqarfianni atorfilittaq Qanoruumi oqarsimappat tamanna eqqumiigisassaananilu ippinnartortaqanngilaq. Aammattaaq allaaserinnittup allaaserinnipallannginnermini KNR-imi oqaatigineqartut eqqortut pissarsiarineqarnissaat pisariaqarsorisimanngimmagu eqqumiiginarsinnaavoq. Aamma suliami paasissutissanik pissarsinissaq siunertaralugu AG Inatsisartut Allattoqarfiannut saaffiginnissimanngilaq. Tamanna tusagassiornermi pitsaasumik ileqqoqarnissamut periuseqarnissamullu naapertuunnersoq qularutigineqarsinnaavoq.
Aammattaaq allaaserisami kukkusumik oqaatigineqarpoq inuussutissarsiutinut ilinniartitaanerit Inuusuttut Inatsisartuini aallartitaqanngitsut. Inatsisartut Allattoqarfiannut sianernikkut tamatuma eqqunnginnera AG-mit paasineqarsimasinnaagaluarpoq. Taamaaliluni ilaatigut Saviminilerinermik Ilinniarfik ilaatinneqarpoq. Aalisarnermik piniarnermillu ilinniarfik pilersinneqarsimagaluarpat taanna Inuusuttut Inatsisartuini peqataanissamut neqeroorfigineqarsimassagaluarpoq.
Aallaaserisami AG-p eqqaavaa aalisartoq inuusuttoq ilinniartuunnginnini pissutigalugu Inuusuttut Inatsisartuini ilaaqqusaanngitsoq. Inuusuttorli taaneqartoq Inuusuttut Inatsisartuini peqataarusulluni Inatsisartut Allattoqarfiannut saaffiginnissimanngisaannarpoq. Taamaalilluni kissaatip tamatuma piviusunngortinnissaanut Inatsisartut Allattoqarfiat iliuuseqarniarnissamut periarfissinneqarsimanngilaq. Taamaattoqassappat aalisartunik inuusuttunik Inuusuttut Inatsisartuini peqataasussanik toqqaanissaq sutigut tamatigut ima ingerlanneqartariaqarpoq inuusuttut aalisartut tamarmik toqqarneqarnissamut assigiimmik periarfissinneqarlutik.
Inuusuttut Inatsisartui tamarmik immikkut nalilerneqartarput, aammalu Inuusuttut Inatsisartuisa katitigaanerat siunissami allanngortinneqarsinnaavoq. Taamaattoqassappat allaaserinnittup oqaatigisaanit annertunerusumik isumaliutiginneqqaarluni tamanna pisariaqarpoq. Taamaalilluni Inuusuttut Inatsisartuisa katitigaanerat siamasinnerusunngortinniarneqassappat tamanna qanorpiaq piviusunngortinneqassanersoq nalilerneqartariaqarpoq. Qinersinikkut peqataasussat toqqarneqartassappat? Qinersinermullu tamatumunnga kikkut taasisinnaatitaassappat? Tamatumunnga taarsiullugu peqataasussat soqutigisaqaqatigiiffinnit toqqarneqartassappat ? Sorlernillu? Inuusuttut peqataasinnaatitaasunut akuunngitsut periarfissaqartinneqassanngillat ? Inuiaqatigiinni ikinnerussuteqartut qanoq pineqassappat? Tamatuma saniatigut apeqqutit aningaasaqarnermut tunngasut ilanngunneqassapput. Assersuutigalugu inuusuttut inuussutissarsiummik ingerlataqartut sulisartullu peqataassagunik sulinermi isertitassaraluanut annaasanut taarsiivigineqartassappat? Suliffissarsiortut Inuusuttut Inatsisartuini peqataassagunik suliffittaarnissamut piareersimasutut isigineqarsinnaappat?
Inuusuttut Inatsisartui siusinnerusukkut ingerlanneqartut peqataasunit pitsaasumik misigisaqarfiusimapput. Tamanna tunngavigalugu AG-p taamatut allaaserinninnermigut tusagassiornikkut annikitsuinnarmik tunngavissaqarluni suliniut nuannarineqartoq manna tikillugu innuttaasunit tapersersorluarneqartoq soqutigilluarneqartorlu pillugu ajortumik pitsaanngitsumillu isiginnilersitsiniarsarinera paasiuminaatsorujussuuvoq.
Tamat oqartussaaqataanerannut atatillugu inuiaqatigiinni suliaqarnermi innuttaasut peqataanerisa ataavartunngortinneqarsinnaaneranut nukittorsarneqarsinnaaneranullu isumassarsianik siunnersuutinillu pitsaasunik tusagaqarnissaminut tigusaqarnissaminullu Inatsisartut Allattoqarfiat ammajuarpoq.