Nutaarsiassat


2024 2023 2022 Flere år...

19-06-2009

Inatsisartunut siulittaasuusimasut marluk qalipanneqarnerisa uleerneqarnerat

Inatsisartunut siulittaasuusimasut Ole Lyngep aamma Daniel Skiftep qalipanneqarneri Inatsisartut siulittaasuannit Josef Motzfeldtimit ullumi tallimanngornermi ulloq 19. juni 2009-mi uleerneqarput.

 

Ole Lynge (IA), piffissami 1999-imi novemberimit 2000-imi decemberimut Inatsisartunut siulittaasuusimasoq, qalipanneqarnermi uleerneqarnerani najuuppoq. Ole Lyngep siulittaasuusimanermini maniguuttumik ilumoorluni Inatsisartunut ilaasortanut ataqqinnilluni assigiimmik sullissinissamik pingaartitsisuusimaneranik Josef Motzfeldtip oqalugiarnermini nersualaarpaa.

 

Daniel Skifte (A) piffissami 2001-imi majimit 2002-mi novemberimut Inatsisartunut siulittaasuuvoq. Uleersinermi peqataasinnaanngilaq, Josef Motzfeldtillu oqaaseqarnermini eqqortumik “ileqqorissuusuunerarpaa”.

 

Tamarmik unneqqarillutik suliaminnut tunniusimasuusimasut aammalu namminersornerulersimanerup oqaluttuarisaanerani maanna qaangiutilersumi Inatsisartut Siulittaasoqarfiata inerisarneqarnerani sunniuteqaqataasimanerat Josef Motzfeldtip erseqqissarpaa.

 

Qalipakkat taakku marluk uleerneqarnerisigut Inatsisartut siulittaasorisimasaat katillugit qulingiluaasut tamaasa qalipagaatigineqalerput, taamaallaalli ullualunnguit matuma siornatigut Inatsisartut siulittaasorisimasaat arnaq siulleq Ruth Heilmann qalipagaatigineqarnani.