2024 2023 2022 Flere år...
10-07-2009
Hash-imik pasilliineq pillugu Suleriaaseq pillugu Ataatsimiititaliami ataatsimiinneq
Nutsernermut atatillugu Inatsisartut Siulittaasuata inigisimasaani hash-iminermik nassaartoqarsimaneraaneq tunngavigalugu Inatsisartut Suleriaaseq pillugu Ataatsimiititaliaat ullumi ataatsimiippoq.
Inatsisartut Siulittaasuata, Josef Motzfeldt-ip, Inatsisartuni partiit tamarmiusut ilisimatissinnaajumallugit Siulittaasoqarfiup ataatsimiigiaqqunissaanut taarsiullugu Suleriaaseq pillugu Ataatsimiititaliaq aggersassallugu toqqarsimavaa. Atassut aamma Kattusseqatigiit Partiiat Siulittaasoqarfimmi sinniisuutitaqanngillat taamaattorli Suleriaaseq pillugu Ataatsimiititaliami sinniisuutitaqarlutik, taanna aamma taaneqarsinnaagunarpoq ”Siulittaasoqarfik annertusisaq”.
Ataatsimiinnermi pisimasut pillugu ataatsimiititaliami ilaasortanut Josef Motzfeldt Suleriaaseq pillugu Ataatsimiititaliamut ilisimatitsivoq. Hash-i nassaarineqarsimasoq ilisimasaqarfiginngikkini pasilliutigineqartullu assut tupaallaatigisimagini erseqqissaatigaa. Politiinut nassuiaateqarsimavoq taakkulu maanna nutserisunik apersuipput.
Naggataatigut politiit misissuinerata ingerlanerani Siulittaasoqarfimmi aammalu Suleriaaseq pillugu Ataatsimiititaliami ataatsimiittarnerit eqqarsaatigalugit suliamut akuusinnaannginnini nassuerutigiguniuk eqqornerpaassasoq Josef Motzfeldt-ip nalunaarutigaa. Tamatuma kingunerisaanik ulluni tulliuttuni Siulittaasoqarfimmi aamma Suleriaaseq pillugu Ataatsimiititaliami ataatsimiittarnissat Olga Poulsen Berthelsen-imit, siulittaasup tullia siullermit aqunneqartassapput kiisalu Akitsinnguaq Olsen sinniisussatut ilaasortaalissalluni.
Josef Motzfeldt-ip aalajangerneq taanna toqqarpaa, peqataasarnissani pisumi matumani ataatsimiititaliap sulineranut aammalu suliani allani sunniuteqartikkumanagu.
Inatsisartut sinnerlugit
Olga P. Berthelsen
Siulittaasup tullia siulleq