2024 2023 2022 Flere år...
21-08-2009
Nunat Avannarliit Killiit Siunnersuisoqatigiivisa sapaatip akunnerata tulliani Savalimmiuni ukiumoortumik ataatsimiinneranni Inatsisartut Siulittaasuat Jo-sef Motzfeldt peqataassaaq
Nunat Avannarliit Killiit Siunnersuisoqatigiivisa ulluni 25. – 27. august 2009-mi Savalimmiuni Runavíkimi Tórshavnimilu ukiumoortumik ataatsimiinneranni Inatsisartut Siulittaasuat Josef Motzfeldt peqataassaaq.
Ataatsimiinnermi Nunat Avannarliit Killiit Siunnersuisoqatigiivisa siulittaasuannik nutaamik qinersisoqassaaq. Kári P. Højgaardip Savalimmiuneersup ukioq ataaseq siulittaasooreernerata kingorna siunnersuisoqatigiit siulittaasuattut nutaatut qinigassanngortinnissani Inatsisartut Siulittaasuata Josef Motzfeldt qilanaaraa.
Tamatuma saniatigut Inatsisartunut ilaasortat atorfilittallu nunanit avannarlernit killerneersut, Norgimeersut Sverigimeersullu 35-t missaanniittut ullut pingasut ingerlaneranni suliassat nunani avannarlerni killerni pingaartitat oqaluuserissavaat.
Nunani avannarlerni killerni ilinniartitaanikkut suleqatigiinneq ukioq manna oqaluuserisassani pingaarnerutillugu salliutinneqarpoq, tamatumani ilaatigut nunap immikkoortuani nunat avannarliit højskoliannik pilersitsinissaq kissaatigineqarluni. Tamatumunnga atatillugu ilinniartitaanikkut suleqatigiinneq pillugu nunani avannarlerni killerni naalakkersuisunut aalajangersagassatut siunnersuutit pingasut siunnersuisoqatigiinnit oqallisigineqassapput. Ilinniarsimanngitsunik ilinniartitsineq pillugu immikkut qulequtaqarluni Siunnersuisoqatigiit ataatsimeersuarnerannik qaammatip matuma aallartilaarnerani Kalaallit Nunaanni ingerlanneqartumik siunnersuutit aallaaveqarput. Ungasianit ilinniartitsineq pillugu suleqatigiinnissamik pilersaarut taakku ilagaat.
Ukiumoortumik ataatsimiinnermi sammisat allat oqalligisineqartussat ilagaat EU-mik oqaloqateqarneq aammalu pingaartumik puisit amiinik eqqussueqqusiunnaarneq kiisalu nunarsuup kiatsikkiartornera aammalu tamatuma kingunerisai periarfissartaalu. Kiisalu aalisarneq, kultureqarnikkut suleqatigiinneq, takornariartitsineq angallannerlu oqallisigineqassapput.
Nunat avannarliit killiit suleqatigiinnerat pillugu paasissutissat allat Nunat Avannarliit Killiit Siunnersuisoqatigiivisa internetimi quppersagaanni takuneqarsinnaapput www.vestnordisk.is.