Nutaarsiassat


2024 2023 2022 Flere år...

28-08-2009

Inatsisartut siulittaasuat Josef Motzfeldt Nunat Avannarliit Killiit Siunnersuisoqatigiiffianni siulittaasutut nutaatut qinerneqarpoq

Inatsisartut siulittaasuat Josef Motzfeldt Nunat Avannarliit Killiit Siunnersuisoqatigiivisa Siunnersuisoqatigiit siulittaasuattut nutaatut qinerpaat. Taanna qinerneqarpoq Siunnersuisoqatigiit ukiumoortumik Savalimmiuni Tórshavn-imi Runavík-imilu augustip 25-anit 28-anut 2009 ukiumoortumik ataatsimiinneranni. Josef Motzfeldtip kingoraarpaa maannamut  siulittaasuusoq Kári P. Højgaard, Savalimmiut Lagtingianut  ilaasortaq.

 

Ivertinneqarluni oqalugiaammini Josef  Motzfedltip tikkuarpaa nunat avannarliit killiit pingasuusut nunani avannarlerni suleqatigiinnermut tamakkiisumik peqataasussaanerat, erseqqissarluguli nunat pineqartut taakku nunanut avannarlernut sanilliullugit immikkooruteqarmata aammalu immikkuullarillutik ataatsimoorfigisaminnik soqutigisaqarmata, Nunat Avannarliit allat soqutigisaannut assersuunneqarsinnaanngitsut. Erseqqissarpaa tamana tunngavigalugu Nunat Avannarliit Killiit Siunnersuisoqatigiiffeqarmata. ”Nunat avannarliit killiit suleqatigiiffissaraat ataatsimut soqutigisat sulissutigissallugit illersussallugillu, tassa nunami namminermi nunallu taakkua akornanni soorlu ataatsimoorussamik isumalluutinut tunngasuni, oqaluttuarisaanermi, kultureqarnermi, imarmut avatangiisinullu tunngasuni, kisianni tamakkua tamarmik uloriarnartorsiortinneqarput” Josef Motzfeldt oqarpoq.

 

Aamma erseqqissarpaa nunat avannarliit killiit soqutigisaat nunani tamalaani suleqatigiinnermi saqqumilaartuartinneqarnissaat sulissutigineqarmat. ”Nunat ataasiakkaat nunallu tamalaat suleqatigiiffeqarnissaat ullumikkut nunarsuatsinni pingaaruteqaleraluttuinnarpoq, pingaartumik nunaaqqanut taaneqartartunut, taakkua tusaajumaneqartarnerat killeqartaqimmat”, Josef Motzfeldt oqarpoq. Taamaammat neriorsuutigaa ineriartornermut malinnaalluarumaarluni, sulissutigiumallugulu Siunnersuisoqatigiit Siulittaasoqarfiat nunat tamalaat suleqatigiinnerannut akuutittarumaarlugu, Siunnersuisoqatigiiffik nunani tamalaanni suleqatigiinnermut sunniuteqarneruleqqullugu.

 

Nunat Avannarliit Killiit Siunnersuisoqatigiiffiata ataatsimiinnerani kalaallit aallartitaannut Josef Motzfeldt siulittaasuuvortaaq. Siusinnerusukkut arlaleriaqaluni Nunat Avannarliit Killiit Siunnersuisoqatigiiffiannut ilaasortaasarsimavoq. Josef Motzfeldt eqqaassanngikkaanni Siulittaasoqarfimmut nutaamut siulittaasup tullinngorput Ólína Þorvarðardóttir Altingimi ilaasortaq aamma Kári P. Højgaard, Savalimmiuni Lagtingimi ilaasortaq.

 

Nunat Avannarliit Killiit Siunnersuisoqatigiiffiat tulliani ukiumoortumik ataatsimiissapput aappaagu 2010-mi Tasiilami.