Nutaarsiassat

01-09-2009

Kultureqarnermut Ilinniartitaanermullu Ataatsimiititaliaq Torshavnimi aasaanerani ataatsimiippoq

Inatsisartunut ilaasortaq, Anda Uldum, ulluni 26.-28. august 2009-mi Torshavnimi Savalimmiuniittumi Kultureqarnermut Ilinniartitaanermullu Ataatsimiititaliap aasaanerani ataatsimiinnerani peqataavoq

Kultureqarnermut Ilinniartitaanermullu Ataatsimiititaliap ukiumoortumik aasaanerani ataatsimiinneq Savalimmiuni ingerlanneqarnissaa toqqarpaa, matumani ilaatigut kultureqarnermut aaqqissuusseqqinnissap suliarineqarnera Nunat Avannarliit Kultureqarneq pillugu oqallittarfianni Kultureqarnermut Ilinniartitaanermullu Ataatsimiititaliaq nalunaaruteqarnissaminut periarfissaqarluni.

Tamatuma saniatigut Avannaamioqatigiinni Ministerit Siunnersuisoqatigiiffiata 2010-mut missingersuutai Kultureqarnermut Ilinniartitaanermullu Ataatsimiititaliap oqaluuserai. Pingaartumik ukioq manna Kultureqarnermut Ilinniartitaanermullu tunngasuni missingersuutit annertuumik isumaqatigiinngissutaallutillu oqallisaapput, missingersuusiammi pisarnermit amerlanerusunik allannguuteqarfiummata. Nunat tamalaat suleqatigiinnerulernissaasa aallartisarneqarnissaa pillugu siusinnerusukkut aalajangigaq pingaarnertut oqallinnissamik kajumilersitsivoq. Oqallinnerit ineriartornissamik kissaateqarnermik imaqarput allannguinissarli tunuarsimaarfigineqarluni.

Tamatuma saniatigut ilaasortat siunnersuutaannik Kultureqarnermut Ilinniartitaanermullu Ataatsimiititaliaq suliaqarpoq. Ilaasortat siunnersuutaat ilaatigut makkununnga tunngassuteqarput:

- atuarfimmi kulturi

- assassorluni suliat annikkitsut

- qarasaasiaq atorlugu pinnguaatit ineriartortinneqarnissaannut

  tapiissuteqariaaseq

- sikuiuitsumi kujallermi Qalasersuarmilu sila pillugu misissuineq il.il.

Tamatuma kingorna kultureqarnerup iluani, ilinniartitaanermut ilisimatusarnermullu nunanit avannarlernit tapiissutisisartut ataasiakkaat Kultureqarnermut ilinniartitaanermullu Ataatsimiititaliap qaaqquvai, taamaaliornikkut pineqartut pilersaarutitik oqaluttuarisinnaaniassammatigik.

Suliffeqarfik/pilersaarut Seanergy, ataatsimiititaliamut ilisaritinneqarpoq, suliffeqarfimmit taassannga aalisakkat amiinit tarngusiaq (kollagen) suliarineqartarluni.

Tamatuma saniatigut pilersaarut Cafe Pantopia Ataatsimiititaliami ilaasortanut ilisaritinneqarpoq, taassuma siunertaraa Atlantikup Avannaani nunanut attuumassuteqartunut inunnut ataatsimut naapittarfiliornissaq, tassa Kalaallit Nunaanni, Islandimi, Savalimmiuni Danmarkimilu, Nuummi, Reykjavikími, Tórshavnimi Københavnimilu aallaaveqartumik cafe-liornikkut, sukumiinerusumik paasisaqarusukkuit takuuk: www.cafe-pantopia.net

Nunat Avannarliit Siunnersuisoqatigiivini ataatsimiinnissat tulliuttut Inatsisartuniit peqataatitaqarnissamik periarfissalik:

- Kultureqarnermut ilinniartitaanermullu Ataatsimiititaliaq Europarådip Kultureqarnermut Ataatsimiititaliaa peqatigalugu ulloq 8. september 2009 Folketingip Landstingssaliani ulloq naallugu ataatsimiisitsissapput. Ataatsimiinnermi sammineqassapput ”Atuarfimmi Kulturi”, Siunissami innuttaasut sullinneqarnerat” aamma ”Qarasaasiakkut piginnittussaatitaaneq”. Tamatuma saniatigut ulloq taanna ”Islam, Islamism and Islamophobia” qulequtsiullugit saqqummiussisoqassaaq/tusarniaasoqassaaq.

- Nunat Avannarliit Siunnersuisoqatigiivisa ulluni 27.-29. oktober 2009-mi 61-issaanik Stockholmimi Sverigemiittumi ataatsimiinnginneranni, ulluni 29.-30. september 2009-mi Nunat Avannarliit Siunnersuisoqatigiivini ilaasortat Ålandimi ataatsimiissapput.

Annertunerusumik paasissutissat pillugit Inatsisartunut ilaasortaq, Anda Uldum, mobil (00299) 58 73 05-imut attavigineqarsinnaavoq.

Nunat Avannarliit Siunnersuisoqatigiivi Inatsisartutigoortumik suleqatigiiffiuvoq 87-inik ilaasortaqartoq, Norgimit, Danmarkimit, Sverigimit, Finlandimit, Islandimit nunanillu namminersorlutillu oqartussaanermik aaqqissuussiffigineqarsimasunit Ålandimit, Svalimmiunit Kalaallillu Nunaannit.

Nunat Avannarliit Siunnersuisoqatgivini Inatsisartut marlunnik ilaasortaatitaqarput marlunnillu sinniisussaqarlutik. Inatsisartunut ilaasortat Olga P. Berthelsen Inuit Ataqatigiinniit aamma Anda Uldum  Demokraatiniit ilaasortaapput, sinniisussaralugit Inatsisartunut ilaasortaq Akitsinnguaq Olsen Inuit Ataqatigiinnit aamma Inatsisartunut ilaasortaq Justus Hansen Demokraatinit. Olga P. Berthelsen Avatangiisinut Pinngortitamilu isumalluutit pillugit Ataatsimiititaliami ilaasortaavoq Anda Uldumilu Kultureqarnermut Ilinniartitaanermullu Ataatsimiititaliamut ilaasortaalluni.