Nutaarsiassat


2024 2023 2022 Flere år...

01-10-2009

Inatsisartunit sulinngiffeqarsinnaanermut periarfissat

Atuagagdliutit (kinguliini ”AG”-mik taagorneqartoq) ulloq 1. oktober 2009 saqqummersoq Inatsisartunut ilaasortat sulinngiffeqartut pillugit pingaarnerutitatut nalinginnaasumillu allaaserisaqarpoq. Pingaarnerutitap qulequtaatigut Inatsisartunut ilaasortat ”sulinngiffeqarnermik nappaateqartutut” taagorneqarput oqaatiginiarneqarlunilu ”Inatsisartut ukiaanerani ataatsimiinneranni ….. ersarissoq innuttaasut qinigaat peqataanngitsut qanoq amerlatigisut”. Tamatuma saniatigut AG isumaqarpoq ajornarsinnaasariaqanngitsoq Inatsisartut Allattoqarfiata sulinngiffeqarnermut tunngavilersuutaasut immikkoortunut qulliunerusunut immikkoortiterpagit, taamalu naalakkersuinikkut ammasumik ingerlatsinissaq naammassillugu.

 

Tamatumunnga Inatsisartut Allattoqarfiat makkuninnga oqaaseqaatissaqarpoq:

 

Naalakkersuisunut ilaasortat arfineq-marluk Naalakkersuisuni ilaasortaanerminni Inatsisartunit sulinngiffeqarnissaminnik qinnuteqarsimapput. Ilaasortat taakku ataatsimiittarfimmi suli ”sulipput” – sulinngiffeqarnerminni taaseqataasinnaanngiinnarlutik. Ataatsimiititaliat sulineranni peqataasinnaanngillat – kisianni aamma taamaaliorsinnaassanngikkaluarput sulinngiffeqarunnaassagaluarunilluunniit.

 

Inatsisartunut ilaasortaq ataaseq sulinngiffeqarpoq, Naalagaaffiit Peqatigiit ataatsimeersuarnerani Inatsisartut sinniisaattut peqataanermini. Taamatut sinniisutut peqataaneq pissutissaqarluni peqataannginnertut isigineqarpoq, tamatumani nunat tamalaat akornanni suleqatigiiffimmi Kalaallit Nunaata soqutigisaanik isumaginninneq pineqarmat, peqatigitillugulu sumiiffimmi allamiinnissaq ajornarmat.

 

Tamanna isumaqarpoq Inatsisartunut ilaasortat allanik pissuteqarlutik sulinngiffeqarnissamik qinnuteqarsimasut pingasuinnaasut. Inatsisartut suleriaasiat malillugu Inatsisartut Siulittaasoqarfiat tassaavoq sulinngiffeqarnissamut akuersissuteqarnissamik aalajangiisartoq. Inatsisartut tassanilu oqartussaasutut inissisimasut paasitinneqarsinnaatitaanermut inatsimmut ilaatinneqanngillat, inatsit pissutissaqarluartumik taamaallaat Naalakkersuisunut kommuninullu tunngammat. Taamaattumik Inatsisartunut ilaasortat ataasiakkaat namminneq akisussaaffigivaat sulinngiffeqarnissamik qinnuteqarnermut pissutaajunnartunik innuttaasut paasissutississallugit.

 

Inatsisartut Allattoqarfiat