2024 2023 2022 Flere år...
28-10-2009
Taaguut "nunat namminersortut" Nunat Avannarliit Killiit Siunnersuisoqatigiiffiata aamma...
Nunat Avannarliit Siunnersuisoqatigiiffiata 61-issaanik ataatsimiinnerani, ullumi makkunani Stockholmimi ingerlanneqartumi, Nunat Avannarliit Killiit Siunnersuisoqatigiiffiata Nunallu Avannarliit Siunnersuisoqatigiiffiata siulittaasoqarfii ataatsimeeqatigiipput, ataatsimiinnermi Nunat Avannarliit Killiit Siunersuisoqatigiiffiata nunanut namminersorfiusunut taaguutaasartup allanngortinneqarnissaa kaammattuutigalugu.
Nunat Avannarliit Siunnersuisoqatigiiffiata kaammattuutigaa Nunat Avannarliit Siunnersuisoqatigiiffiata Nunanilu Avannarlerni Ministerit Siunnersuisoqatigiiffiata pisortatigoortumik allakkiaanni nittartagaannilu ilaasortanut taaguummut ”nunat sumiiffiillu namminersorfiusut” taarsiullugu siunissami taaguut ”naalagaaffiit nunallu“, taamaassanngippallu ”naalagaaffeqatigiit nunallu“ imaluunniit ”naalagaaffiit nunallu namminersortut“, atorneqaleqqullugu. Taamatut kaammattuuteqartoqarpoq oqaatsip ”nuna”-p atorneqarnera imatut paasineqaqqunagu, tamatumani Savalimmiut Kalaallillu Nunaat ilaatinneqanngitsut.
Nunat Avannarliit Killiit Siunnersuisoqatigiiffiata siulittaasua Josef Motzfeldt oqarpoq: ”Siunnersuisoqatigiit Savalimmiunut Kalaallillu Nunaannut eqqunngitsuliornertut isigaat oqaaseq ”nuna” taamaallaat naalagaaffinnut namminersortunut taaguutitut atorneqartarmat. Taamatut isumaqarnitsinnut qitiuvoq Savalimmiuni nunatsinnilu paasinninnerput imaammat tamatta nunaasugut, tassani innuttaasut nunanut allanut attaveqarfigisanut assigiinngitsutigut atassuteqarlutik, kisiannili piginnaatitaalluta qaqugukkulluunniit atassutinit taamaattunit avissaarsinnaanitsinnut nunatullu namminersulivilluta. Eqqaasitsissutigivarput Helsingforsimi isumaqatigiissummi Savalimmiut nunarpullu pineqartillugit taaguut ”sumiiffiit” nassaassaanngimmat. Taamaattumik Nunat Avannarliit Killiit Siunnersuisoqatigiiffiata kissaatigaa Nunat Avannarliit Siunnersuisoqatigiiffiata Nunanilu Avannarlerni Ministerit Siunnersuisoqatigiiffiata tamanna tunngaviusumik naalakkersuinikkut isummerfigissagaat. Erseqqissassavarput Siunnersuisoqatigiiffitta kissaataata naammassineqarnissaa inatsisitigut aporfissaqanngimmat.”
Tamatuma saniatigut Siunnersuisoqatigiiffiit siulittaasoqarfiisa aamma nunat avannarliit killiit pisuussutinik uumassusilinnik suugaluartunilluunniit piujuaannartitsinermik tunngavilimmik iluaquteqarniarsinnaatitaanerat, nunat avannerlermiut højskoliinik pilersitsisinnaaneq annaassiniarsinnaanermullu upalungaarsimatitaqarnermi suleqatigiinneq oqaluuseraat. Kalaallit Nunaanni annaassiniarsinnaanermut upalungaarsimatitassanik ineriartortitsinissamut pisariaqartitsinermik nalilersueqqissaarnissaq kiisalu Nunani Avannarlerni Killerni annaassiniarsinnaanermut upalungaarsimasut akornanni attaveqartarnerup suleqatigiinnerullu, aamma Norgep peqataaffigisaata, nukittorsarneqarnissaat siunertaralugit suliniummik Kalaallit Nunaat aallartitsisimavoq.
Ataatsimiinnermi Nunat Avannarliit Siunnersuisoqatigiiffiani siulittaasup tulliata Ólína Þorvarðardóttirip ”Aalisakkanik pisuussutinik nunani avannarlerni killerni iluaquteqarniarnermik aqutseriaatsit assigiinngitsut” qulequtaralugu aamma 2010-mi Nunat Avannarliit Killiit aalajangersimasumik qulequtaqarlutik ataatsimeersuartitsinissanni sammineqartussaq saqqummiuppaa. ”Nunarsuup immikkoortuani tamatumani tamarmi misilittakkat katersorneqarnerisigut aalisarnermut tunngasutigut naalakkersuinikkut ingerlatsineq pillugu oqallinnermi timitalimmik peqataanissatsinnut piareersimanerulissaagut EU-milu aalisarneq eqqarsaatigalugu ataatsimut naalakkersuinikkut nutaamik ingerlatseriaaseqarniarnermut tunniussaqarnerusinnaalluta“, Ólína Þorvarðardóttir oqarpoq.
Paasissutissat sukumiinerusut Nunat Avannarliit Killiit Siunnersuisoqatigiiffiata nittartagaani www.vestnordisk.is–imi pissarsiarineqarsinnaapput.