Nutaarsiassat


2024 2023 2022 Flere år...

30-10-2009

Silap pissusiisa allanngoriartornerisa iliuuseqapallannissaq pisariaqartippaat

Nunat Avannarliit Killiit Siunnersuisoqatigiiffiata siulittaasuata Josef Motzfeldtip Sverigemi Nunat Avannarliit Siunnersuisoqatigiiffiata ataatsimeersuarnerani naammasseqqammersumi oqalugiarnermini tikkuarpaa Issittumi inuit nunat suliffissuaqarfiusut mingutsitsinerisa kingunipiluinik annertuunik misillertitaasimasut. Ilaatigut tikkuarpai Kalaallit Nunaanni kangerluit ilaanni sermit uukkartartut kilometererpassuarnik tunuarsimaneri, taamatullu aamma naasoqassutsikkut uumasoqassutsikkullu allannguutit qanoq malunnartigineri. Tamakku tamarmik innuttaasut inuunerannik inooriaasiannillu, minnerunngitsumillu piniartukkormiunik, toqqaannartumik sunniisimapput.

 

Josef Motzfeldtip erseqqissarpaa Nunat Avannarliit Killiit Siunnersuisoqatigiiffiata taamaattumik iliuuseqapallannissaq piumasarigaa, decembarimilu Københavnimi silap pissusii pillugit ataatsimeersuartoqarnerani angusaqartoqanngippat tamanna akuerineqarsinnaassanngitsoq. Nunat suliffissuaqarfiusut ajornartorsiut namminneq pilersitseqataaffigisimasartik qaangerniarlugu akisussaaffik tigusariaqarpaat. Erseqqissarpaa iliuuserisartakkatta avatangiisinik innaarliinnginnerusumut saatinniarneqarnissaat kingusinaanngitsoq. Tamanna soorunami akeqassaaq, iliuuseqanngikkuttali suli akisunerussaaq.