2024 2023 2022 Flere år...
13-10-2009
Inatsisartut Peqqissutsimut Ataatsimiititaliaata tusagassiutinut nalunaarutaa
Peqqissutsimut Ataatsimiititaliaq ulloq 8. oktober 09 ataatsimiinnerminni aamma ulloq 10. oktober 09 Peqqissutsimut Naalakkersuisup, peqqinnissaq pillugu SANA-mi isumasioqatigiisitsineranut atatillugu peqataanerminni ima tusagassiuutinut nalunaaruteqarumavoq.
Siullermik ataatsimiititaliap pingaartillugu erseqqissarumavaa nunatsinni Peqqinnissaqarfiup aaqqissuuteqqinnissaata ingerlanerani maannamut angusai pilersaarutaalu isumalluarfigalugit malinaavigi
gamigit. Peqqinnissaqarfiup aaqqissuussaanerata nutarternissaa politikkikkut aallarnisarneqarpoq 1998-mi. Maannamut pilersaarutit piviusunnguleraluttuarput, ukiunilu aggersuni pilersaarutaareersut malillugit misileraanerit (januarip aallaqqaataa 2010) aallarnisaataasumik ingerlanneqarsimaleriarpata, nuna tamakkerlugu tamakkiisumik atuutilernissaa pilersaarutaavoq januarip allaqqaataa 2011 aallarnerfigalugu.
Peqqissutsimut ataatsimiititaliap malinnaavigeqqissaarpaa ukiuni kingullerni Peqqinnissaqarfiup ingerlatsinikkut aningaasartuutaasa ikigisassaanngitsunik amigartooruteqarluni ingerlanera. Maannamut Peqqissutsimut Naalakkersuimit Aningaasaqarnermullu ataatsimiititaliamit, ataatsimiititaliamut paasissutissiinerit malinnaatitsinerillu takutippaat, suli amigartooruteqarfiusumik ingerlatsisoqarnissaa.
Peqqinnissaqarfiup aaqqissuussaanera eqqarsaatigalugu tamakkiisumillu sulisussaqarniarneq eqqaarsaatigalugu, suliaritinniarlutik utaqqisut tassaanngaannartumillu suliaritittariaqartut aallaavigalugit, peqqinnissaqarfimmi aningaasaqarniarneq missingiusiorneqartaneralu, eqqortumik aningaasaliinissamut missingersoruminaattarsimavoq. Tamatuma maanna qujanartumik eqqumaffigineqarluni malinnaavigineqaqqissaarnerata kingunerisaanik, siunissami iliuusissat missingersuusiornerillu qanoq isikkoqarumaarnerannik ilusiliinissamut tikkuusseqataasussaapput.
Peqqissutsimut Ataatsimiititaliap erseqqissarumavaa maannamut Peqqinnissaqarfimmi sulisuusut pikkoreqalutik tamaviaarlutillu innuttaasunik sullisseqataarusunnertik takutittuarmassuk. Taakkuuppullu aamma pissutsinut ilisimaarinnillutik inuiaqatigiinnut uagutsinnullu politikkerinut oqariartuuteqartartut.
Inuiaqatigiinni nappaatit assigiinngitsut inuillu inuuneqqortusiartornerat aallaavigalugu katsorsartariallit suliaritittariaqartullu annertusiartuinnarnerat sullissisuusunik ilisimatusartunillu takussutissiarineqarluni saqqummiunneqartarpoq. Inooriatsip allanngoriartornera ilutigalugu nappaatit assigiinngitsut katsorsarneqarnissamik pisariaqartitsisut innuttaasut akornanni amerliartorput ilaatigullu ilungersunarsiartorlutik.
Peqqinnissaqarfiup iluani ilinniarsimasunik sulisussaaaleqinerup kingunerisaanik utaqqisutut allattorsimasut takutippaat malinnaaniarnerup qanoq ilungersunartiginera. Taamaakkaluartoq peqqinnissaqarfiup iluani tulleriiaarisinnaanerup pitsaasumik ingerlajuarnissaa pillugu sulisooreersut ilungersorlutik angummanniarsaralutillu sullipput. Tamannalu pillugu Peqqissutsimut Ataatsimiititaliap sulisooreersut ataqqillugit nersuaalarumavai, inuiaqatigiinni pitsaasumik sullisseqataanerat kivitseqataarusunnerannillu ersersitsinerummat.
Nakorsassaaleqinera aamma nunani avannarlerni naggueqatittalu akornanni takornartaanngilaq. Tamanna iliuuseqarfiginiarlugu siunissami soorlu, issittumi nakorsassatut immikkut ilinniagalittut piginnaanngorsarsinnaanerat aaqqissuussinikkut iliuuseqarfigineqarsinnaanissaa siunissami eqqarsaasersorfigineqarsinnaavoq. Maannamummi misilittakkat ersersereerlugillu takussutissiaraat, nakorsat naappaatinut aalajangersimasunut ilinniagallit, peqqissaasutullu ilinniagallit sivitkitsuinnarmillu nunatsinni atorfeqartinneqartartut aningaasatigut Peqqinnissaqarfimmut nanertuutaasartut. Tamanna politikkikkut iliuuseqarusussusermik takutitsinikkut ikorfartueqataanermillu siunnerfeqarnikkut isumaliutersuutigalugu ingerlateqqinneqarsinnaavoq.
Peqqissutsimut Ataatsimiititaliap inuiaqatigiit kaammatorumavai inooriaatsimik pitsaasumik maannamut periarfissaareersut iluini ingerlatsiniaqqullugit, soorlu assersutigineqarsinnaasut makku ilaatigut taakkartorsinnaavagut:
Meeqqat atuarfianni atuartitsinerni pinngitsoorani sammisassatut ilaatinneqartariaqarpoq, sumiiffinni toqqakkani / lokale valg, timip atornerunissaanik peqqinnarnerusumillu nereriaaseqarnerup atuarfinni sumiiffinnilu ataasiakkaani aaqqissuussaanerusumik ingerlanneqarneratigut. Ataatsimiititaliap kaammatuutigiumavaa atuarfinni ataasiakkaani atuarfinni siulersuisut (skolebestyrelse)suliassaminnut pingaartillugu ilaatissagaat.
Ilanngullugu ataatsimiititaliap kaammatuutigiumavaa angajoqqaat meeqqatik peqatigalugit kommunerisami sumiiffinnilu ataasiakkaani inuunerinnissamut suliniutinut aaqqissuussanut assigiinngitsunut peqataasarnissaannut.
Peqataanikkut suleqataanikkullu inuuneq peqqinnanerusoq inoqatit allat peqatigalugit misigisaasarmat pitsaasoq inuummarissaataasorlu. Tamanna nappaatinut assigiinngitsunut ilaatigut pinngitsoortitseqataasinnaasoq ilisimatusarnerit arlallit uppernarsereermassuk.
Peqqissutsimut Ataatsimiititaliamut apeqqutigiumasat ataatsimiititaliap siulittaasuanut Olga P. Berthelsen oqarasuaat +299 55 33 68-mut sianerluni saaffiginnissutigineqarsinnaapput.