2024 2023 2022 Flere år...
14-10-2009
Naalakkersuinikkut suliniaqatigiiffinnut aningaasatigut tapiissuteqar-tarneq
Atuagagdliutit (matuma kingorna ”AG”-mik taagorneqartoq) 13. oktober 2009-mi saqqummersitamini nr. 74-imi, quppernermi 2-mi qulequttami ”Tapiissutit pisuusaarnerlu” allappoq Inatsisartuni partiit suli amerlanernik taperneqartalissasut. Quppernerni 10-mi 11-milu qulequtalinni ”Partiit tapiiffigineqarnerulissapput” innersuussutigineqarpoq ”Naalakkersuinikkut sulinermut aningaasatigut tapiissuteqartarneq pillugu allannguutissatut siunnersuut”.
Inatsisartuni partiit amerlanerusunik tapiiffigineqartalernissaannik oqaatigineqartoq eqqunngilaq.
Taamaattumik Inatsisartut Siulittaasoqarfiata erseqqissaatigissavaa naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut, UKA 2009/82, taaneqartoq missingersuutinut sunniuteqassanngimmat.
Inatsisissatut siunnersuutikkut anguniarneqartut ilaatigut tassaapput Naalakkersuinikkut suliniaqatigiiffinnut pisortat tapiissuteqartarneranni inatsisitigut tunngavissanik aalajangersimasunik pilersitseqqinnissaq aammalu pisortat tapiissutaasa ersarissuutinneqaqqilernissaat, tamanna tapiissutit tamat oqartussaaqataaneranni inatsisinut naapertuuttuunissaannut pisariaqarmat. Ilaatigut partiinut siunnersortit aningaasarsiaannut imaluunniit partiit aalajangiiffigisassatut siunnersuutinik nutserisitsineranni aningaasartuutinut atugassatut partiinut toqqaannanngitsumik tapiissutit Inatsisartut kontoannit pingaarnermit partiinut tapiissutinut kontomut pingaarnermut nuunneqarmata siunnersuut ataatsimut isigalugu missingersuutinut sunniuteqassanngilaq.
Tapiissutit sullississutillu sorliit Inatsisartut missingersuutaat aqqutigalugit partiit allattoqarfiinut atugassanngortinneqarsinnaanersut inatsisissatut siunnersuummi itisilerneqarpoq. Taamaaliornikkut qulakkeerneqarpoq sapinngisamik annertunerpaamik ersarissuunissamik anguniagartik Inatsisartut malissagaat, taamaalillutillu tamat oqartussaaqataaneranni atugassarititaasut nukittorsarlugit.
Aviisinik nassiussuinermut tapiissutinut aaqqissuussinermut atuuttumut imaluunniit tamatuma allanngortinneqarnissaanik pilersaarutigineqartumut inatsisissatut siunnersuut saqqummiunneqartoq attuumassuteqanngilaq. Taamaattumik aviisinik nassiussuisarnermut atatillugu tusagassiorfinnut tapiissutit allanngortinneqarnerata naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuummut atatinniarneqarnera eqqortuunngilaq.
Josef Motzfeldt
Inatsisartut siulittaasuat