2024 2023 2022 Flere år...
22-10-2009
Nunat Avannarliit Siunnersuisoqatigiiffiata 61-issaanik ataatsimiin-nerani Inatsisartut peqataassapput
Oktobarip ulluisa 27-ianniit 29-annut 2009 Nunat Avannarliit Siunnersuisoqatigiiffiat Stockholmimi ataatsimiissaaq 'Nunat Avannarliit EU-lu' pingaarnertut qulequtaralugu. Inatsisartuniit peqataassapput Olga P. Berthelsen aamma Bitten Høegh-Dam.
Ukioq manna ataatsimiinneq, ilaatigut nunani avannarlerni amerlasuuni suliffissaaleqinerup annertuseriarsimaneranik malitseqarsimasumik, aningaasaqarniarnikkut ajornartorsiortoqarneranit sunnersimaneqartussaavoq. Nuna ataatsimiigiaqqusisuusoq Sverige, massakkut aamma EU-mi siulittaasoqartitsisoq, Østersø eqqarsaatigalugu ilioriusissatut pilersaarummik saqqummiussaqassaaq. Pingaartutut sammineqartussaq alla tassaavoq 2009-mi decembarimi Københavnimi silap pissusii pillugit Naalagaaffiit Peqatigiit nunarsuatsinni siuttunik ataatsimeersuartitsinissaa.
Sapaatit akunnerat ataatsimeersuarfiusussaq taamaattumik ammarneqassaaq silap pissusii pillugit oqallinnermik nunani avannarlerni tallimani ministeriunernit tamanit, nunani namminersorfiusuni aquttunit nunanilu avannarlerni tamani illuatungiliuttunit peqataaffigineqartumik.
Inatsisartut Siulittaasuat Josef Motzfeldt Nunat Avannarliit Killiit Siunnersuisoqatigiiffianni siulittaasutut ataatsimiinnermi peqataassaaq. Nunat Avannarliit Killiit Siunnersuisoqatigiiffiata siulittaasoqarfia Nunat Avannarliit Siunnersuisoqatigiiffiannik nunanilu avannarlerni suliassaqarfinnut assigiinngitsunut nunallu avannarliit suleqatigiinnerannut ministerinik ataatsimeeqateqartassapput suliassat siunnersuutillu nunanut avannarlernut killernut tunngasut kissaatigisatut angusaqarfiunissaat siunertaralugu.
Nunat Avannarliit Siunnersuisoqatigiiffiata ataatsimiinnerani ilaasortat 87-it nunanit avannarlernit nunanillu namminersorfiusunit tamanit naalakkersuisunut ilaasortat ikigisassaanngitsut ilagalugit peqataassapput. Nalinginnaasarpoq Nunat Avannarliit Siunnersuisoqatigiiffiata ataatsimiinnerani inuit tuusintit missaasa peqataasarnerat. Taakku saniatigut nunanit baltikumimeersunit, Ruslandimit nunarsuullu sinneranit tikeraarpassuit takkutissapput.
Josef Motzfeldt
Inatsisartut Siulittaasuat