2024 2023 2022 Flere år...
23-11-2009
ICC-p aningaasaqarniarnera
Sermitsiaq-mi nr. 47-imi allaaserisaqartoqarpoq ”ICC attartornermut akiliisimanngisaannarpoq” qulequtalimmik. Allaaserisami arlalinnik kukkuneqarpoq matumuuna naqqinneqartunik.
Aallaqqaasiullugu allaaserisami atuarneqarsinnaavoq Aningaasaqarnermut Ataatsimiititaliami ilaasortat marluk piffissami qaninnermi ICC-p præsidentianik ataatsimeeqateqassasut. Erseqqissarneqassaaq tamanna pissammat Aningaasaqarnermut Ataatsimiititaliamut ilaasortatuunngitsoq, Inatsisartunulli ilaasortaannartut.
Allaaserisami atuarneqarsinnaavortaaq Aningaasaqarnermut Ataatsimiititaliap sakkortuumik isornartorsiorsimagaa, ICC, illumut Namminersorlutik Oqartussat suliniaqatigiiffimmut maannamut atorsinnaatissimasaanut, attartornermut akiliuteqanngisaannarsimammat. Tamanna eqqunngilaq. Naalakkersuisut namminneq paasisimavaat ICC-p ineqarnermut akiliineq ajornera Missingersuutit pillugit inatsimmik sanioqqutsinerusoq. Tamatuma kingorna Naalakkersuisut namminneq kukkuneq tamanna iluarsivaat. Aningaasaqarnermut Ataatsimiititaliap pissutissaqartinngilaa Naalakkersuisut taama iliuuseqarsimanerat isornartorsiussallugu.
Allaaserisami oqaatigineqarportaaq ICC-p præsidentiata nunat inoqqaavisa pisinnaatitaaffii pillugit isumasioqatigiinnissamut Aningaasaqarnermut Ataatsimiititaliap peqataanissaa kissaatigigaa. Aningaasaqarnermut Ataatsimiititaliaq qaaqqusissummik pisortatigoortumik tigusaqanngilaq, taamaattumillu tigusarnissani utaqqissallugu ataatsimiititaliap suliassaqarfii eqqarsaatigalugit aaqqissuussinermut taamaattumut peqataasinnaaneq isummerfigitinnagu.
Paasissutissat sukumiinerusut Aningaasaqarnermut Ataatsimiititaliap siulittaasuanut Naaja Nathanielsen, angallattagaq (+299) 29 57 04 saaffiginnilluni pissarsiarineqarsinnaapput.
ICC suliniaqatigiiffiuvoq naalakkersuisutiguunngitsoq namminersortoq, ilaatigut Aningaasanut Inatsit aqqutigalugu tapiissutinik pissarsisartoq. 2010-mi pisortanit tapiissutit 5,4 mio. kr.-iunissaat naatsorsuutigineqarpoq. Tamatumunnga ilanngunneqassaaq attartornermut akiliuteqartalernerup suliniaqatigiiffimmut aningaasatigut artukkiinissaata matussuserallarneqarnissaa siunertaralugu 2010-mi tapiissutit 557.000 kr.-inik qaffanneqarallarnissaat naatsorsuutigineqarmat. 2011-miit aallartittumik aningaasanut inatsimmi kontumut pingaarnermut 10.19.07, ICC, aningaasaliissuteqarnermut aallaaviit naapertorlugit suliniaqatigiiffimmut Nunatta Karsianit tapiissutit ikilisinneqassapput.