2024 2023 2022 Flere år...
28-11-2009
Upernaakkut ataatsimiinneq tallimanngornermi ulloq 9. april 2010 aallartissaaq
2009-mi ukiakkut ataatsimiinneq ulloq 25. september aallartippoq ullumilu ulloq 27. november 2009 unilluni.
Ukiakkut ataatsimiinnermi sammisat pissanganartut amerlapput immikkoortullu amerlasuut Inatsisartut suliaralugit angumeraat. Pingaartumik oqaaseqarnissamut piffissaliussat nutaat amerlasuunit oqaaseqarfigineqartarlutillu nalilersorneqartarput.
Tassunga atatillugu oqaaseqarnissamut piffissaliussat nutaat pillugit isummat amerlasoorpassuit pillugit naatsumik matumani paasissutissiissuteqartoqassaaq.
Oqaaseqarnissamut piffissaliussat nutaat pillugit oqaatigineqartorpassuit tunngavigalugit Siulittaasoqarfik ulloq 19. oktoberimi sivikitsumik isumasioqatigiippoq, tamatumani Inatsisartut ataatsimiinneranni sapaatit akunnerini siullerni marlunni oqaaseqarnissamut piffissaliussat nutaat atorneqarnerat Siulittaasoqarfimmit nalilersorneqarluni.
Tamanna tunngavigalugu oqaaseqarnissamut piffissaliussat nutaat atorneqarnerat pillugu oqaatigineqartut pitsaasut pitsaannginnerusullu erseqqissumik inerniliiviginnginnerini oqaluuserinneriaatsit suut tamaasa Inatsisartunit misilerarneqartariaqartut Siulittaasoqarfik inerniliivoq. Oqalliseriaatsit taakku tamarmik oqallinnerni assigiinngitsunik iluseqartinneqarnerat pissutigalugu aammaanermi oqallinnermi, inatsisissatut siunnersuutinik siullermeerinermi, aappassaaneerinermi pingajussaaneerinermilu, aalajangiiffigisassatut siunnersuutilerinermi, apeqquteqaatinik oqaluuserinninnermi, nassuiaasoqarnerani Naalakkersuisunullu apeqquteqartoqarnerani oqalliseriaatsinik tamanik ingerlatsinermi oqaaseqarnissamut piffissaliussanik nutaanik misileraanissamut Inatsisartut periarfissinneqassasut Siulittaasoqarfik naliliivoq.
Naalakkersuisunulli ilaasortat Inatsisartunullu ilaasortat oqaaseqarnissamut piffissaliussanik nutaanik sunngiussiniarnissaat aamma pisariaqartinneqarsimasoq aammalu oqaaseqarnissamut piffissaliussa ni nutaani periarfissanik sungiussiniarnissamut periarfissinneqarnissaat, soorluttaaq partiit oqaaseqartartui oqaaseqarnissamut piffissaliussat atorlugit nutaavissuarmik atuuffeqalersut tamannalu aamma sungiunniartariaqaraat inerniliunneqarsinnaavoq.
Taamaalilluni eqqumaffigisassat taakku allarpassuillu aammalu oqaaseqarnissamut piffissaliussat allanngortinneqarnissaat pisariaqartinneqarnersoq imaluunniit Inatsisartut ataatsimiinnerata tamarmiusup naammassinerata kingorna oqalliseriaaseq naleqquttumik iluseqalersimanersoq aammalu oqaaseqarnissamut piffissaliussanik nutaanik atuutsitsilernermi siunertarisanik tunngavigineqartunik naammassinninnersoq 2010-mi upernaakkut Inatsisartut ataatsimiinnerata aallartinnginnerani Siulittaasoqarfiup nalilersussavai.
Taamaalillutik Inatsisartut upernaakkut ataatsimiinnissaasa ulloq 9. april 2009-mi aallartinnissaa pillugu aalajangernermikkut Inatsisartut ukiakkut ataatsimiinnertik ulloq 27. novemberimi naammassivaat.
Annertunerusumik paasissutissat kissaatigineqarunik Inatsisartut Siulittaasuat Josef Motzfeldt mobilimut (+299) 55 76 41 sianernikkut saaffigineqarsinnaavoq.