2024 2023 2022 Flere år...
07-12-2009
Inatsisartut namminerisaminnik COP15-imut aallartitaqarput
Nunatsuatsinni siuttut silap pissusii pillugit ataatsimeersuarnerat COP15 Københavnimi ullumi aallartimmat Inatsisartut namminerisaminnik aallartitaqarput.
Inatsisartut Eqqissisimatitsinermut Avatangiisinullu Ataatsimiititaliami ilaasortanit tallimaasunit ilaasortat marluk COP15-imut peqataassapput. COP15 piffissami decembarip ulluisa arfineq-aappaanniit 18-iannut 2009 ingerlanneqassaaq, piffissanullu marlunnut avinneqarsimalluni, siulleq decembarip ulluisa arfineq-aappaanniiit aqqaneq-aappaannut ingerlassalluni aappaalu decembarip ulluisa 14-ianniit 18-iannut 2009.
Akitsinnguaq Olsen Siumut piffissap siulliup ilaanut peqataassaaq, Jane Petersen Inuit Ataqatigiit ullut kingulliit sisamat peqataasoq. Taamaalilluni Inatsisartuni naalakkersuisuutitaqartut illuatungiliuttullu tamarmik silap pissusii pillugit ataatsimeersuarnermut pingaarutilimmut matumunnga peqataatitaqassapput.
Eqqissisimatitsinermut Avatangiisinullu Ataatsimiititaliap ilaasortat peqataasussat qinnuigisimavaat piffissami sumiiffinnilu silap pissusiisa malunnartumik allanngoriartorfigisaanni inuussutissarsiornikkut siuarsaanerup attatiinnarneqarsinnaaneranut ineriartortinneqarsinnaaneranullu atatillugu oqallinnerit, paasissutissat oqaaseqaatillu pingaarteqqullugit. Tamatuma saniatigut silap pissusiisa allanngoriartornerannut atatillugu nioqqutissanik pilersorneqarneq tamatumanilu ajornartorsiutaasinnaasut ataatsimiititaliap soqutigai.
Ilaasortat peqataasut marluk isumaqatigiinniarniviit saniatigut pisorpassuarnut allanut peqataanissaminnut aamma periarfissaqassapput. Akitsinnguaq Olsen aamma Jane Petersen danskit inatsisartuinit, Folketingip Avatangiisinut Pilersaarusiornermullu Ataatsimiititaliaat ilanngullugu, peqataasut 40-ut missaat ilagalugit taakkununnga aaqqissussaasimasunut pisussanut taamaalillutik aamma peqataanissaminnut periarfissaqassapput. Inatsisartunut ilaasortat marluk taamatuttaaq ingerlaavartumik Naalakkersuisut aallartitaannik Kuupik Kleistimit siulersorneqartunik oqaloqateqartassapput.
Ataatsimeersuarnerup nalaani taamatuttaaq nunat avannarliit killiit sinniisoqarfiat Nordatlantens Brygge assigiinngitsunik aaqqissuussiviullunilu pisoqarfiusassaaq, Inatsisartunit peqataasut aamma peqataaffigisinnaasaannik.
Paasissutissamik sukumiinerusunik pissarserusukkaanni attaveqarfissaq:
Ataatsimiititaliap siulittaasua Naaja Nathanielsen, nana@inatsisartut.gl, oqarasuaat 29 57 04