2024 2023 2022 Flere år...
26-01-2010
Inatsisartut Avannarliit Siunnersuisoqatigiiffianni ilaasortaatitaasa 2010-mi Siunnersuisoqatigiiffimmi sulinertik ulloq 25. januar aallarnissavaat
Inatsisartunut ilaasortat Nunat Avannarliit Siunnersuisoqatigiiffianniittut, Olga P. Berthelsen aamma Per Berthelsen, nunat avannarliit suleqatigiinnerannut atatillugu Københavnimi ingerlatani assigiinngitsuni ippassarli peqataapput.
Ataasinngormat Verdensbanken aammalu tamanna pillugu nunat avannarliit-baltikummillu suleqatigiiffiannik pilersitsinissaq pillugu Christiansborgimi ulloq tamaat ataatsimiinnermi Olga P. Berthelsen peqataavoq.
Ullumi aqagulu Olga P. Berthelsen, Per Berthelsen peqatigalugu Nunat Avannarliit Siunnersuioqatigiiffianni partiit politikikkut ataatsimiinneranni ataatsimiititaliallu ataatsimiinnerini peqataassaaq, tamatumani Nunat Avannarliit Siunnersuisoqatigiiffianni ilaasortat ataatsimeeqatigiinneranni naligiissitaaneq oqaluuserineqassalluni.
Nunat Avannarliit Siunnersuisoqatigiiffianni tungiuinermut ataatsimiititaliami Nunani avannarlerni utoqqaat inuuniarnikkut pitsaasumik atugaqarnissaat pillugu 2010-mi sammisaqarfiusussami ilaasortatut Olga P. Berthelsenip ataatsimiititaliami ilaasortat allat peqatigalugit Københavnip kommuniani peqqinnissamut isumaginninnermullu ingerlatsivik pingasunngorpat takuniassavaat. Inatsisartunut Nunat Avannarliit Siunnersuisoqatigiiffianni tungiusinermut ataatsimiititaliameersunut Højdevangs Sognimi utoqqaat angerlarsimaffianni ilaatigut saqqummiunneqassapput puiguttortunut anguniakkat iluini nutaamik pilersitsiniarnermi suliniutit, sammisassatigut sungiusarnikkullu neqeroorutit kiisalu tungiuinermi teknologiikkut aaqqiissutissat.
Tamatuma saniatigut aqagu Europa-Parlamentimit, Europa-Kommissionimit kiisalu nunani avannarlerni inatsisartunit peqataaffigineqartumik Folketingimi EU-p aalisarnermut politikia pillugu isumasioqatigiinnermut Per Berthelsen Nunat Avannarliit Siunnersuisoqatigiiffianni avatangiisinut pinngortitamilu pisuussutinut ataatsimiititaliami sinniisutut qaaqquneqarpoq. EU-p aalisarnermut politikianik nutarterinermi Nunat Avannarliit Siunnersuisoqatigiiffiat eqeersimaartumik peqataavoq, tamannalu tun-ngavigalugu isumasioqatigiinneq ingerlanneqassalluni.
Nunat Avannarliit Siunnersuisoqatigiiffiata nalinginnaasumik ataatsimiinneri ingerlanneqassapput ulluni 13. aamma 14. april 2010-mi Norgimi.
Annertunerusumik paasisaqarusukkaanni Inatsisartunut ilaasortat peqataasut saaffigineqarsinnaapput:
Olga P. Berthelsen, mobil +299 55 33 68 aamma
Per Berthelsen, mobil +299 55 33 61
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq 87-inik ilaasortalik nunanit makkunaneersunik: Norge, Danmark, Sverige, Finland, Island aammalu nunat namminersorfiusut Åland, Færøerne aamma Kalaallit Nunaat.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarlutilu marlunnik sinniisussaqarput. Inatsisartunut ilaasortat Olga P. Berthelsen, Inuit Ataqatigiinnit aamma Alaqa Hammond Siumumit ilaasortaapput, taakkulu sinniisussaraat Inatsisartunut ilaasortaq Hans Aronsen Inuit Ataqatigiinnit aammalu Inatsisartunut ilaasortaq Per Berthelsen Siumumit. Olga P. Berthelsen Nunat Avannarliit Siunnersuisoqaatigiiffianni tungiuinermut ataatsimiititaliami ilaasortaavoq aammalu Aleqa Hammond avatangiisinut pinngortitamilu pisuussutinut ataatsimiititaliami ilaasortaalluni.